RS inthlanah BJP che tha

Kar kalta Zirtawpni-a Rajya Sabha seat 59-a inthlanna neihah BJP chuan seat 28-ah hnehna changin, Parliament Upper House-ah party mala seat nei ngah ber a ni a, mahse BJP kaihruai NDA hian majority a la nei pha chuang lo a ni..

Rajya Sabha seat ruak 59-ah hian seat 33-ah chuan candidate-te chu chuhtu awm loin tlinga puan an lo ni tawh a, Zirtawpni khan seat 26-ah vote thlak a ni.

Chuhtu awm loa RS member atana tlinga puan mi 33 zinga 16 hi BJP candidate niin, pathum chu an thawhpui party dang ami an ni a, Congress member panga an awm bawk.

Uttar Pradesh-a RS seat 10-ah BJP hian seat kua a la a, seat khat chu SP candidate Jaya Bachchan-in ala thung. West Bengal-ah chuan Trinamool Congress-in seat li lain, Congress-in seat khat a la bawk. Congress candidate Abhishek Manu Singhvi chu Trinamool Congress hian an thlawp a ni. Chhattisgarh-ah RS seat pakhata inthlan buatsaihah BJP national general secretary Saroj Pandey thlan tlin a ni. Karnataka-ah rorle lai Congress chuan seat pathum lain, BJP chuan seat khat an la bawk. Karnataka-ah hian JDS chuan inthlan hi a boycott a ni. Telangana-ah chuan rorel lai Telangana Rashtra Samithi (TRS) chuan inthlan neihna seat pathumah hnehna an chang vek a ni. Jharkhand-ah BJP in seat hnih an la a, Kerala-a JD(U) Sharad Yadav-a lamṭang pawl hruaitu, MP Veerendra Kumar chu thlan tlin a ni. Kumar hi rorel lai CPI(M) kaihhruai LDF in a thlawp a ni.

BJP hi Rajya Sabha-ah party lian ber niin seat 69 a nei a, Congress party chu a seat neih zat 54 aṭangin 50-ah a tlahniam thung. BJP kaihhruai National Democratic Alliance (NDA) hian Rajya Sabha-ah seat 85 a nei a, mahse majority nei tura seat neih ngai zat 126 erawh a la pha lo hle.