Lalu Prasad Yadav-a kum sarih tang turin hrem leh

Rashtriya Janata Dal (RDJ) hotu Lalu Prasad Yadav-a chu kar kalta Inrinni han ranchaw man tihchingpen thubuaiah kum sarih tang tura leh, cheng nuai 30 chawi tura hrem a ni leh.

Ranchi-a Special Bureauof Investigation (CBI) court chuan Lalu Yadav hi a thubuaiah hian March 19 khan thiam loh a lo chantir tawh a ni. Hei hi ranchaw tihchingpen kaihhnawiha thubuai siamsak pali-na a ni.

Lalu Prasad-a Bihar chief minister a nih laia central aṭanga ranchaw man tur sum an dawn ṭhanhnem tham tak tihchingpen a nih chungchang hi kum 1996, January thla khan Chaibasa deputy commissioner Amit Khare-an Animal Husbandry Department a dap hnuah hai lan a ni.

Kum 1996, March thla khan Patna High Court chuan Central Bureau of Investigation (CBI) chu ranchaw man tihchingpen dan hi chhui chiang turin a ti a, CBI hian FIR a thehlut nghal a ni.

Kum 1997, June thlaa CBI-in thubuai a ziahluhah hetihlaia Bihar chief minister Lalu Prasad Yadav chu thil dik loa titu zingah a hming telh a ni.

July, 1997-ah Lalu Prasad chu chief minister a nihna aṭanga bangin, CBI court-ah a inpe a, judicial custody-a dah a ni. A nupui Rabri Devi chuan CM hna hi a lo thawk zui a ni.

Kum 2000, April tlaah Rabri Devi pawh thubuaiah hian telh a ni a, mahse bail-a chhuah a ni. Kum 2001, October thlaah Surpeme Court chuan Bihar ṭhen a nih tak avangin he thubuai hi Jharkhand High Court kutah a hlan.

Kum 2002, February thlaah Jharkhand-a Special CBI court-ah thubuai hi ngaihtuah ṭan a ni.

Kum 2006, December-ah Patna lower court chuan Lalu Prasad leh Rabri-te chu an sum lakluh phu loa hausaa puhna thubuaiah thiam a chantir.

March, 2012-ah Lalu Prasad leh Bihar CM hlui dang Jagannath Mishra-te chu thubuai siamsak an ni.

Kum 2013, September-ah Lalu Prasad, Mishra leh midang 45-te chu ranchaw man tihchingpen thubuai pakhatah thiam loh chantir a ni. Lalu hi Ranchi jail-ah dah a ni a, Lok Sabha member a nihna aṭangin ban a ni a, inthlana a chuh khapsak a ni bawk.

Kum 2013, October thlaah Lalu chu kum nga tang tura hrem niin, cheng nuai 25 chawi tir a ni bawk.

December, 2013-ah Supreme Court chuan Lalu Prasad-a bail-a chhuah dilna a pawmsak.

December, 2017-ah CBI special court chuan Lalu Prasad leh midang 17-te chu an thubuai dangah thiam loh a chantir.

Kum 2018, January thlaah Lalu chu kum thum leh a chanve tang turin special court-in a hrem. March thlaah a thubuai pali-naah Jharkhand court chuan Lalu chu thiam loh a chantir leh, Jagannath Mishra erawh a thubuai a tihtawpsak thung.