Sorkar laipuiin state-te vaccine lem laka fimkhur turin a chah

International market-ah Covishield vaccine lem zawrchhuah a awm nia report a awm avangin sorkar laipui chuan state tinte chu fimkhur tura chahin, Inrinni khan ramchhunga Covid vaccine a tak leh lem thliar hran theihna tur a tichhuak a ni.

Union health ministry chuan state-te hnenah lehkha thawnin, vaccine tehna tur kawng an siam hmanga a tihchhuahte hian vaccine lem leh a tak an thliar hrang thei dawn tih sawiin, India rama vaccine pathum hman mek - Covishield, Covaxin leh Sputnik V siamchhuaktute hnen aṭanga information an dawnte an tichhuak dawn tih a sawi.

State hnena lehkha thaw­nah hian vaccine siam­tuten label, colour leh chhinchhiahna kimchang zawk an siamte pawh an hrilh nghal a ni.

Report ṭhenkhatin a tarlan danin, India rama Covid-19 vaccine an hman pui ber Covishield lem chu Southeast Asia leh Africa-ah an man tih an puang. Vaccine lem hi India ram chhungah pawh hralh chhuah a awm nia sawi a ni bawk.

World Health Organisation (WHO) chuan coronavirus vaccine lem laka fimkhur turin mipuite chu ngenin, sorkar pawhin report-te hi a chhuichhiang zui nghal a ni.

"Ramchhungah Covishield vaccine lem siamchhuah a awm tih thawm kan hria a. India sorkar chuan hemi chungchang hi a chhuizui mek a,a mawhphurtu hriatchhuah a nih chuan an lakah thubuai siamsak an ni ang," tiin Health Minister Mansukh Mandaviya chuan a sawi.

Health minister chuan vaccine hman lai mekte bakah puitlingten an hman tur vaccine dang pathum pawh a awm belh thuai dawn tih a sawi. "Tunah hian India ramah vaccine pathum - Covishield, Covaxin leh Sputnik hman mek a ni. Vaccine dang pathum a lo thlen leh thuai beisei a ni, heng zingah hian Zydus Cadila pawh tel. A dang pahnih chu Genova leh Biological Evans siamchhuahte an ni," a ti.

January aṭanga ram puma vaccine semchhuah hna kalpui a nih aṭang khan sorkar hian vaccine dose vaibelchhe 68 chuang a pe chhuak tawh. Kar liam ta Inrinni khan dose nuai 62.25 pekchhuah leh a ni. India hian January 16 aṭang khan khawvela vaccination drive lian ber a kalpui mek a ni.