Bhabanipur bypoll-ah Mamata Banerjee ding dawn
West Bengal-a Bhabanipur Assembly by-election neih turah Trinamool Congress chuan chief minister Mamata Banerjee a ding dawn tih an puang. By-election hi September 30-ah neih a ni ang.
BJP chuan by-election-a an party candidate tur hi an la thlang lo a, an hruaitu ṭhenkhat chuan he biala inthlan neih tura chak zawh an inring lo nia sawi a ni. Hei vang hian hun khawhralna maiah an ngai a, mahse vawiin lam hian meeting neiin candidate tur hi ruat fel an tum.
Mamata Banerjee hi kumina assembly inthlanah khan Nandigram-ah dingin, a khingpui BUP candidate Suvendu Adhikari lakah vote 1,956 in a chak lo a ni. Chak zo lo mah se TMC hian sorkarna an siam avangin Banerjee hi CM-ah dah zui a ni tho a, mahse CM dinhmun chelh chhunzawm zel tur chuan sorkar an siam aṭanga thla ruk chhunga MLA atana thlan tlin a ngai a ni.
May 2-a inthlan result puan anih hnu lawk khan Mamata-in Assembly inthlan a chuh a, a hna ngai a chelh chhunzawm theih nan Bhabanipur MLA leh state minister Sovandeb Chattopadhyay chuan a seat hi kianin banna a thehlut a ni. Election Commission (EC)-in Inrinni liam ta khan by-election neih hun tur hi a puang a ni.
By-election neih hun tur puan hnu lawkah rorellai party hian Banerjee tan campaign an ṭan nghal. Banerjee pawhin Pathiannia Salt Lake stadium-a Durand Cup a hawn dawnah party worker ṭhenkhatte nen inkawnhona hun an hmang bawk.
EC-in Bhabanipur by-poll atana hriattirna chu nimin khan tichhuakin, September 13 thleng inthlan chuh tum tan nomination paper thehluh theih a ni ang. September 14-ah candidate-te lehkha chu enfiah a ni dawn a, inhnuhdawhna hun atan September 16 thleng hun hawn a ni. September 30-ah vote thlakin, October 3 hian vote chhiar a ni ang.
BJP thupuangtu Samik Bhattacharya chuan an party candidate siam tur chungchanga central lama an hruaitute kuta dah a nih thu sawiin, "Mamata Banerjee khingpui tur sawi tur ka ni lo. Thawhlehniah kan sawiho ang. Ka sawi theih chu he by-poll hi Assembly inthlan dangte ang bawkin tha tho takin kan hmachhawn leh dawn a ni," a ti.