Kerala-ah kar khat chhungin hri kai nuai 2 chuang awm ; India-ah kar 23 chhunga hri vanga thi tlem ber ṭum thleng

India ramah Pathianni thleng khan ni sarih chhung chu Covid-19 kai thar a la danglam nasa lo a, Kerala-ah chuan kar hmasa khan kar 16 chhunga hri kai tam ber ṭum thlengin, hri kai thar nuai hnih chuang an awm a ni.

Hetih mek lai hian India ram pumah chuan March 22-28 inkar aṭang khan kar khat chhunga hri vanga thi an tlem ber ṭum a thleng thung. Kar hmasa khan coronavirus vanga thi 2,533 an awm a, March 29-April 4 hnua hri vanga thi 3,000 an tlin loh ṭum khatna a ni.

Kerala-a hri kai pung thar vang hian Covid kai hi an tlahniam hlei thei lo a ni. Kar liam ta(August 30-September 5) chhung khan hri kai 2,89,700 an awm a, a kar hmasa leha hri kai 2,91,644 aia an tlemna chu 0.7% chiah a ni pha.

Kerala-ah chuan kar khat chhungin hri kai thar 2,00,430 an nei a, May 10-16 aṭanga kar 16-na hnua a san ber ṭum niin, ramchhunga hri kai aṭanga 69% an tling pha. India rama state-in kar khat chhunga hri kai nuai hnih chuang an neih hnuhnun ber chu kar 14 liamtaa Tamil Nadu-in May 24-30 inkara nuai 2.26 an neih ṭum kha a ni. Kerala-ah hian Covid peak hi thleng tawha ngaih a ni a, kar khata hri kai an punna 3.8%-ah a tla thla tawh a ni.

Hetih lai hian Maharashtra leh Odisha-ah te hri vanga thi nasa takin a tlahniam, hei vang hian ram pumah hripui vanga thi pawh 26% in an tlakhniam phah bawk.

Pathianni khan ramchhungah hri vanga thi 219 an awm a, March 29 hnua Covid-19 vanga thi ni khata 300 aia tlem an awm ṭum khatna a ni. March 22-a hri vanga thi an tlem ber ṭum a ni bawk. Ramchhungah hri kai thar 40,000 hnuailam 39,571 an awm a( Jharkhand data la nghah mek), Kerala state bikah hri kai thar 26,701 an nei a ni.