Kristiana inlehtira puh vangin Raipur pastor leh mi dang 2 sawisa

Chhattisgarh state khawpui, Raipur-a police station-ah Pathianni khan pastor leh Kristian pawl pakhata hruaitu pahnihte chu Kristian sakhuaa midangte inlehtira puhin, right-wing organisation member-ten an sawisa.

Right-wing activist-ten an sawisakte hi pastor Harish Sahu bakah, Chhattisgarh Christian Forum general secretary Ankush Bairyekar leh Prakash Masih-te an ni. Purani Basti police station chhungah kut thlak an ni. Kut an thlak lai video hi social media lamah a darh zui bawk.

Police station-ah complaint thehluh a nih avangin pastor Sahu hi koh a ni a, Bariyekar leh Maish hian kalpuiin, station house officer (SO) chamber chhungah right-wing activist-te hian an lo khawih zui a ni. He thil thleng avang hian Bariyekar chuan complaint a thehlut zui ve nghal a, anmahni khawihtu mi pariatte chu IPC section hrang hrang hnuaiah thubuai siamsak an ni. SHO pawh hi sawn nghal a ni bawk.

August 30 khan Kabirdham district-a Polmi khuaah kum 25 mi, pastor Kawalsingh Paraste chu Kristian sakhuaah midangte inlehtira puhin mi 100 chuangin a inah luhchilhin an lo sawisa tawh bawk. A bungruate suasam sakin a chhungte pawh an khawih tel a ni.