Mehbooba Mufti-i'n house arrest-ah dah a nih thu a sawi

Jammu and Kashmir chief minister hlui, Mehbooba Mufti-i chuan house arrest-a dah a nih thu sawiin, thuneituten J&K boruak a pangngai chho tawh nia an sawi chu thu dik lo a ni, a ti.

People's Democratic Party (PDP) hotu chuan south Kashmir-a Kulgam tlawh a tum chu a in chhuahsan phalsak a ni lo tih sawiin, "Sorkar laipui chuan Afghan mipuite dikna chanvote a ngaihpawimawh sak hle laiin Kashmir mite dikna chanvo erawh a ngaihthah sak leh si a ni. Kashmir boruak chu a la pangngai lo hle a, in chhuahsan pawh phalsak ka ni lo. Hei hian boruak a ṭha chho tawh tia an sawi chu a dik loh zia a tilang a ni," a ti.

Mufti hian twitter-ah a in luhna gate kalhsak leh a bula sipai motor an dah thlalakte pawh a tilang a ni.

Hetih lai hian police-te chuan security thil avangin PDP hruaitu hi Kulgam-a kal lo tura an ngen thu an sawi. Police official chuan, "Ms Mufti hi Z+ security pek anih avangin a kal tumnaah hian security lam pawh nasa taka inbuatsaih a ngai dawn a ni. House arrest-a hren a ni lo a, Kulgam tlawh lo tura ngen a ni chauh a ni," a ti thung.

J&K police-te chuan kar liamta Nilainia India aṭanga inlakhran duhtu pawl hruaitu, Sued Ali Shah Geelani a thih hnuah amah thlawptuten buaina chhuak venthawn thilah khuahkhirhna hrang hrang an siam hnuah, Kahsmir leh Jammu boruak chu a pangngai tawh tih an sawi. Internet dan pangngai anga hman theih vek ni tawhin, khuahkhirhna siam tam zawk pawh thlahdul a ni tawh tih an sawi a ni. Geelani fate chuan a pa ruang hi police-te hian an kut aṭang laksakin, phum a duhna hmunah phalsak loin Hyderpora-a thlanmualah an phum luih tir niin an sawi.