Rahul-a'n NEET exam hun sawn turin phut

Congress party hruaitu Rahul Gandhi chuan nimin khan sorkar laipui hnenah National Eligibility-cum-Entrance Test (NEET)-UG examination neih hun tur chu sawn hla turin a ngen a, sorkar chu zirlaite harsatna hriatpui duh lohah a puh.

Rahul Gandhi chuan zirlaite harsatna hrethiam a, remchang siamsaka exam hun sawnsak turin a ngen a ni.

NEET exam hi September 12-a neih tura ruahman a ni a, mahse zirlai eng emaw zat chuan exam dang nen a hun a innang a,a bikin CBSE hnuaia compartment exam hun a nih bawk avangin sawn tura hma lak sak turin Supreme Court-ah an thlen a ni. Mahse Thawhṭanni khan court chuan petition-te hi ngaihtuahin, inrawlh a tum loh thu a sawi. Zirlai ṭhenkhat ngenna avang ringawtin exam hi sawn theih a ni lo tih a sawi a ni.

Petition thehluttute aiawha ding, advocate Shoeh Alam chuan CBSE hnuaia zirlai 25,000 vel chuan NEET exam ni hian improvement leh compartment exam an neih a ngai dawn niin a sawi. Mahse Court chuan zirlaite chuan a ruala exam pakhat aia tam a awm dawn a nih chuan duhthlanna an siam mai a ṭul a ni, a ti.

Gandhi chuan zirlaite ngenna anga exam sawn sak tura a ngen rualin, nikuma hripui len zual laia sorkarin NEET (National Eligibility and Entrance Test) leh JEE (Joint Entrance Exams) a buatsaih luih chungchang pawh a sawichhuak leh bawk. Hetih hun lai hian India ramah ni khatah hri kai thar 85,000 chuangte an ni a, mahse sorkar chuan zirlaite himna lam ngaihtuah pui duh loin exam hi a kaltlangpui lui tho a ni, a ti.