Thingtlang zirlai naupang 8% chiahin online class kal thei ; Hri leng vangin private school aṭangin insawnchhuak nasa

India rama hripui leng chuan ziaawm lam a la pan hleithei lo a, inkhuahkhirhna hrang hrang an siam vangin chhungkaw sum lakluh a buai a, sum lama harsatna tawk chhungkaw ṭhahnem tak an awm mek. School-te pawh khar chhunzawm zel an la ni a, a tuar na ber zinga mi chu zirlaite an ni.

Dan pangngai anga school kal theih a nih tak loh avangin online mode hmangin zirtirna pek an ni a, mahse thingtlang lamah mumal taka kalpui theih a ni lo thung. Thingtlang zirlai naupang zinga 8% chiahin 'regular' takin online class an kal theih laiin naupang zinga 37% te chuan lehkha an zir ngai lo tih survey thar ber chuan a tarlang.

Hripui leng vanga sum lama harsatna tawk chhungkaw ṭhahnem tak an awm avangin private school pawhin an tuar phah hle. Thla 17 zet lockdown a nih chhung hian private school-a inziaklut hmun lia ṭhena hmun khat chu sorkar school-ah an insawn tawh a ni.

Economists Jean Dreze, Reetika Khera leh researcher Vipul Paikra vilna hnuaiah state leh UT 15 - Assam, Bihar, Chandigarh, Delhi, Gujarat, Haryana, Jharkhand, Karnataka, Madhya Pradesh, Maharashtra, Odisha, Punjab, Tamil Nadu, Uttar Pradesh leh West Bengal-a zirlai 1,400 aṭanga zirchianna hi neih a ni.

Survey hian online hmanga zirna chuan a la thleng thui lo hle a ni tih an hmuchhuak. Thingtlang leh khawpui dinhmun a inthlau hle a, khawpuia zirlai 24% chuan regular takin online class an nei thei a, thingtlanga zirlai te erawh 8% chiahin regular takin online class an nei thei thung.

Online hmanga zirna an kalpui theih loh chhan lian ber chu smartphone an neih loh vang a nih thu an sawi. Khawpuia cheng, chhungkhata smartphone nei zingah pawh online class kalthei zat chu 31% leh thingtlang lamah 15% chiah an ni. Thingtlanga an buaina lianber pakhat chu school neituten study material an pek ṭhat loh vang emaw an nu leh paten'a an ngaihsak tawk loh vangte a ni tiin zirchianna chuan a sawi tel bawk.

Sorkar laipuiin state-te chu midday meal an dawn ṭhin aiah ei tur emaw, pawisa emaw pe turin hrilh mah se hetianga taka zawm hi an awm ṭha lo hle niin zirchianna chuan a sawi bawk.

Khawpui huam chhunga sorkar school zirlai 20% leh thingtlanga zirlai 14% te chuan engmah an la dawng lo tih an sawi.