JD(S) MLA pasarih-in Congress zawm

Karnataka-a Janata Dal (Secular) MLA hel pasarih chuan Pathianni khan Congress party an zawm a, Congress party-a lakluhnaah hian party president Rahul Gandhi pawh a awm.

MLA lungawi lote hian kar kalta Inrinni khan Karnataka Legislative Assembly aṭangin banna an thehlut a ni. Heng MLA-te hian March 23-a Rajya Sabha inthlanna neih ṭum pawh khan Congress candidate-te an lo vote tawh a ni.

MLA pasarih–Zameer Ahmed Khan, Chaluvaraya Swamy, Iqbal Ansari, Balakrishna, Ramesh Bandisiddegowda, Bheema Nayak leh Akhanda Srinivas Murthy te hi Pathianni-a Rahul Gandhi-an Mysuru-a public rally a neihnaah an party-ah hian a lawmlut a ni. Anni bakah ihan JDS MLC hlui MC Nanaiah, Sarovar Srinivas leh B Ramakrishna-te pawhin Congress party an zawm bawk.

JD(S) chuan an party MLA pasarih-te hi kum 2016-a RS inthlana Congress candidate an vote avangin suspend an lo ni tawh a ni. Heng MLA-te hi nikum August thla khan Chief Minister Siddaramaiah chuan New Delhi-ah hruaiin Rahul Gandhi a lo hmuhpui tawh a, an state assembly inthlan neih hma ngeia Congress an zawm tur an hrilh a ni. JD (S) MLA hel zinga pali hi Karnataka chief minister hlui leh JD(S) state president HD Kumaraswamy nena inhnaih tak leh minsiter hlui te an ni. MLA-te hian JD(S) an chhuahsan chhanah Kumaraswamy hi an puh a, lungrual taka hna thawk thei loin a siam niin an sawi.

JD(S) hotu Kumaraswamy chuan party MLA helte chu JD(S) party leh party worker-ten hetiang dinhmun an thlen theihna atana an tana an thawhsaknate an theihnghilh ta niin a puh a, Rajya Sabha inthlan vawihnihah an party an phatsan tawh tih a sawi bawk. Assembly inthlan an neih tura an party chhuahsantu MLA-te chu Congress ticket-a an ding a nih chuan hneh an nih ngei theihna turin JD(S) chuan theihtawp a chhuah dawn a ni, a ti.