India ram chinah Chinese sipai helicopter thlawk lut

Uttarkhand-a Chamoli district-a Barahoti bialah nimin khan Chinese sipai helicopter chu Line of Actual Control rawn pelin a thlawk kual hmuh a ni. Hei hi thla khat chhunga Chinese chopper-te India ram boruak chinah an rawn thlawh luh ṭum li-na a ni.

March 10 khan Chinese sipai helicopter chu Barahoti-ah hian a lo lut tawh bawk. Chopper hi Indian airspace chin aṭanga km 4 vel zetah a rawn thlawk lut a, minute nga chhung vel a thlawk kual a ni.

March 8 khan Jammu and Kashmir-a Ladakh bialah zing dar 8.55-ah Chinese helicopter pahnih hmuh a lo ni tawh bawk a, Indian airspace chin aṭanga km 18-a thui an rawn thlawk lut. February 27 khan Ladakh-ah vek hian Chinese helicopter chu ramri aṭanga km 19-a thui a rawn thlawk lut tawh bawk.