Journalist kutthlaktu Delhi police constable pahnih hrem

Jawaharlal Nehru University (JNU) zirlaiten lungawi lohna kawngzawh an huaihawtnaa innawr buaina a thlen ṭuma photo-journalist kutthlak a, a camera laksaktu Delhi Police constable pahnih chu Pathianni khan suspend an ni.

Kar kalta Zirtawpni khan JNU zirlaite hian an thil phut hrang hrangte nawrna atan varsity campus aṭangin Parliament Complex panin kawng an zawh a ni. Kawng zawh te hi Sanjy Jheel area-ah police-te chuan lo dangin, zirlaite chu tianga an vuak bakah tuiin an lo phuh bawk.An innawr buainaah hian journalist-te pawh kut an thlak tel a ni.

Journalist pahnih chuan complaint thehlutin, police-te hian chanchin thar lakhawmtute chu kut an thlak tel tih an sawi. Police-te chuan photo-journalist pakhatin police-te hian a camera an chhuhsak tih a sawi avangin thubuai ziahluh a ni a, chhui chian nghal a nih thu an sawi. Camera hi hmuh a ni tawh bawk a ni.

Delhi Police PRO Madhur Verma chuan police constable pahnih chu suspend an nih thu a sawi a, pakhat chu hmeichhe constable niin pakhat zawk chu head constable a ni tih a sawi.