Private doctor-ten tiam chin awm loa nawrh huaihawt tum

India rama private doctor pawl lian ber, Indian Medical Association (IMA) chuan Parliamentary Standing Committee-in National Medical Commission bill chungchanga a rawtna siam duh lohna lantirin, April 2 aṭang hian tiam chin awm loa nawrh huaihawt an tum.

Pathianni khan doctor 25,000 chuang chu Delhi-a Indira Gandhi stadium-ah parliament panel rawtna leh bill duh lohna lantir hian an pungkhawm a ni.

National Medical Commission bill-ah hian alternative medicine practitioner–homoeopathy leh ayurveda zirte chu 'bridge course' an zawh hnuah modern medicine an practice phalsak a rawt a ni. Hei bakah hian India ram chhunga thawk tur chuan MBBS tupawh, foreign aṭanga zirchhuakte pawh National Licentiate Examination (NLE) an paltlang a rawt bawk.

IMA national president Ravi Wankhedkar chuan medical student leh doctor-te chuan April 2 aṭangin tiam chin awm loin nawrh an huaihawt dawn tih a sawi. Wankhedkar chuan sorkar chuan AYUSH, homeopathy, pharmacists leh dentist-te chauh ngaihtuah a, an dinhmun chawisan sak a duh a nih chuan dan siam kher a ngai lo niin a sawi.