May 12-ah Karnataka assembly inthlang dawn

Election Commission of India (ECI) chuan nimin khan Karnataka assembly inthlan neih hun tur a puang. Assembly inthlan hi May 12 ah neih a ni dawn a, May 15-ah vote chhiar niin inthlan result puan nghal a ni ang.

Chief Election Commissioner OP Rawat-a chuan inthlan neih hun tur hi puangin, vote thlakna atan hian EVM bakah VVPAT khawl hman a ni dawn tih a sawi. Inthlan neihna tura hriattirna hi April 17-ah tihchhuah a ni ang a, chuh tumte tan April 24 thleng nomination thehluh theih niin, April 25-ah endik a ni ang. Candidate aṭanga inhnuhdawh duhte tan April 27 thleng hun hawn a ni dawn bawk a ni. ECI-in inthlan neih hun tur a puan tak avangin Karnataka-ah hian Model Code of Conduct hman nghal a ni.

CEC chuan Karnataka-ah hian vote thlak thei, mi vaibelchhe 4.96 an awm tih a sawi a, hei hi state mipui zinga 72% an tling. Inthlan neih hmasakah harsatna te a thlen avangin tun ṭum inthlan neih turah hian dan leh thupek ṭha taka kenkawh a nih theih nan CRPF-te duty tir an ni dawn tih a sawi bawk.

Rawat chuan Karnataka-a assembly inthlan neih tur atana candidate-te sum hman phalzat chu cheng nuai 28 a nih thu a sawi a, polling booth-a sum sen pawh candidate-te sum hman zatah telh vek a ni ang. Vote thlakna tur polling booth hi 56,696 a awm a ni.

Karnataka Legislative Assembly: Karnataka hi India rama state legislature house pahnih (bicameral) neih pasarih zinga pakhat a ni. House pahnihte hi Vidhan Sabha (lower house) leh Vidhan Parishad (upper house) an ni a, State Legislative Assembly hi lower house hi a ni.

Karnataka Legislative Assembly-ah hian seat 225 awmin, constituency 224-ah hian inthlan buatsaih ṭhin a ni a, seat khat hi chu nominated seat niin Governor-in Anglo-Indian Community aiawh a dah ṭhin. Kum 2013-a assembly inthlan neihah khan Congress chuan seat 224 aṭangin seat 122 lain Chief Minister Siddaramaiah kaihhruaiin sorkar an siam mek a ni. Kum 2013 inthlanah hian vote 71.45% a tla a ni.

BJP hotuin EC aiin inthlan hun tur sawilang hmasa :
Nimina ECI in Karnataka inthlan neih hun tur a puanchhua hma hian BJP IT cell hotu Amit Malviya chuan a Twitter-ah Karnataka-ah May 12-ah inthlan neiin, May 18-ah result puan ani dawn tih a lo sawi lawk hmasa a, hei hian inhnialna a chawk chhuak zui nasa hle.

Malviya hian inthlan neih hun tur hi a sawidik a, result puan ni tur erawh a tidik lo. Mahse ECI-in a puan chhuah hmaa inthlan neih hun tur a lo sawi hian sawizui leh sawisel a hlawh hle a ni. Chief Election Commisioner-in press conference a neihnaah reporter-te pawhin hemi chungchang hi an sawichhuak. CEC Rawat-a chuan Malviya thuchhuah hi an ngai thutak hle tih sawiin, EC aṭanga thil put ru a awm a nih chuan thil dik lo titu chu hremna pek ngei a tiam. Malviya hian a twitter-a a thuziah chuan sawizui a hlawh tak em avangin a hnuah a delete leh nghal a ni.

BJP hruaituin EC-in a puanchhuah hmaa inthlan neih hun tur a lo sawi lawk hmasak chungchangah hian Union Minister Mukhtar Abbas Naqvi kaihhruaiin palaite chuan nimin khan EC official-te an hmu nghal a ni.

Congress party thupuangtu Randeep Singh Surjewala chuan BJP chu 'Super Election Commission' dinhmunah an ding tawh nia sawiin a bei zui nghal a ni. Election Commission chu rin ngam a ni zel dawn em tih zawhna pawh siam zuiin, EC thuruk pawimawh a lo tihput avangin EC hian BJP president Amit Shah chu hriattirna pein, BJP IT hotu Malviya lakah chuan FIR a thehlut dawn em tih a zawt.