Karnataka : JDS in Congress nena thawhdun inpeih

Congress President Rahul Gandhi-an Janata Dal (Secular) chu Bharatiya Janata Party (BJP) B-team tiin lo sawi tawh mah se, JDS hotu HD Deve Gowda chuan assembly inthlan neih tura Congress party nena thawkdun turin an inpeih tih a sawi.

JDS hotu chuan, "Inthlan neih hmain Congress hian thawkdun tura rawtna a siam a nih chuan JDS chuan a thawhpui thei a ni. Congress party hian seat eng zat nge min pek theih tih sawi se, keini pawhin seat kan pek theih zat kan ngaihtuah ve dawn a ni. Hemi chungchang hi Congress party nena sawiho a ngai a ni", a ti. Hemi rual hian inthlan zawh hnuah chuan thawhdun chungchang sawiho hi a theih dawn lo tih a sawi thung.

Mayawati-i kaihhruai Bahujan Samaj Party (BSP) leh JD(S) hian Karnataka Assembly inthlan neih tura hian an thawhdun tur thu an lo puang tawh a, kum 2019-a Lok Sabha inthlanpui neih turah pawh an thawkdun chhunzawm zel dawn a ni. BSP hian reserved seat pariat leh general seat 12-ah a chuh dawn a, JDS hian a bak seat 204-ah a chuh thung ang.

Deve Gowda chuan Samajwadi Party-in a thawhpui dun dawn a nih chuan seat ṭhenkhat ken an remtih thu a sawi bawk.