Eptu party-ten CJI banna tur motion putluh tum

Eptu party hrang hrangte chuan Parliament-ah Chief Justice of India Dipak Mishra ban a nihna tur motion putluh tumin hma an la mek a, an zingah hian Congress leh National Congress Party (NCP) pawh an tel.

NCP senior leader DP Tripathi chuan eptu party-te chuan CJI banna tur motion an duang mek tih a lo sawi tawh a, nimin khan Samajwadi Party chuan he hmalakna hi a thlawp thu a sawi. SP hruaitu Ghanshyam Tiwari chuan SP chuan judiciary system zahawmna leh rintlakna vawn nunna tura hmalakna chu a thlawp tih a sawi a ni.

Tripathi chuan epty party MP eng emaw zatin draft proposal an siam chu an hming an sign hnan tawh tih a sawi a, heng zingah hian NCP, Left party bakah TMC leh Congress pawh an tel a ni, a ti.

CJI banna tur motion siam a nih chhan hi kumin January 11-a Supreme Court jugde pali-ten press conference an neih ṭuma an thu sawichhuah kal zel vang a ni. Supreme Court-a judge senior pali-te chuan CJI chu bench a ruat chungchangah dan zawm loah puhin, a kaihhruaina hnuaiah ram chhunga court sang ber, Supreme Court zahawmna chu vawnnun a har an hlauhthawn thu an sawi. Chief Justice paihthlakna tur motion hi Lok Sabha-a pulut tur chuan MP 100-in an thlawp a, an signature an pek a ngai a, Rajya Sabha-ah chuan MP 50 signature neih a ngai thung. Motion hi Rajya Sabha emaw, Lok Sabha-ah emaw a putluh theih ve ve a ni. He motion hi House Speaker/Chairman chuan a lo pawmin a lo hnawlsak thei bawk.

Motion hi pawm a nih chuan CJI puhna chungchang chhuichiangtu tur member pathum awmna committee din a ni ang a, hetah hian Supreme Court senior judge leh High Court judge bakah jurist hriat hlawh tak an tel ang. Committee hian motion hi an thlawp a nih chuan House-ah sawihoin, special majority hmangin Lok Sabha-ah pass a ni ang a, hemi hnu hian Rajya Sabha-ah ngaihtuah lehin two-third majority hmanga pass a ni ang. House pahnih-a motion hi pass a nih chuan, President hnenah Chief Justice of India banna tur hi thlen a ni tawh dawn a ni.