J&K-in ngaihsak a hlawh lo: CM Mufti

Jammu and Kashmir Chief Minister Mehbooba Mufti-i chuan an state-in dinhmun harsa tak a tawk mek chungin ngaihsak a hlawh lo a, thlahthlam an ni tiin a sawi.

Chief Minister hian he thu hi Srinagar-a Travel Agenst Association of India-in 64th convention and exhibition a buatsaihah a sawichhuak a ni.

Mehbooba Mufti-i chuan, "Jammu and Kashmir chuan hun harsa tak a tawk mek a, hei hian Kashmir chauh ni loin Jammu thlengin tourism sector lamah nghawng a nei a ni. Khawvel pum thlirin harsatna chi hrang hrang chu a awm reng a, mahse keini chu kan harsatna tawh ve te hi India ram hian min ngaihven pui loin min thlahthlam a ni", a ti.

Mufti-i chuan an state-in harsatna a tawh mek laiin TV news channel-te chuan an buaina tawhte chu a nihna bakin an vawrh darh a, hei hian ramchhung hmun danga mi, an state tlawh duhte pawh a tihlau vek a ni, tiin a sawi. Kashmir chu ramchhunga hmeichhe tana hmun him ber a nih thu a sawi tel bawk.