Karnataka : Hmeichhe enkawlna hnuaiah polling booth 450 dah dawn

May 12-a Karnataka assembly inthlan neih turah vote thlakna tur polling booth 56,696 siam a ni dawn a, heng zingah 450 chu hmeichhe hlang enkawl tir a ni dawn tih election official chuan a sawi.

Chief Electoral Officer Sanjiv Kumar-an Bengaluru-a press conference a neihah hei hi sawichhuakin, hmeichhe hlang enkawl tur polling booth 450 siam a ni dawn a, hengah hian hmeichhe police dah an ni bakah, polling officer atan pawh hmeichhia vek dah an ni dawn a ni, a ti.

Karnataka assembly term kal mek hi May 28 hian a zo dawn a ni. Assembly inthlan hi May 12-ah neih a ni dawn a, May 15-ah result puan a ni ang. Vote nei mi vaibelchhe 4.96 awmin, heng zinga vaibelchhe 2.52 chu mipa niin, hmeichhe vote nei vaibelchhe 2.44 an awm bawk.

Kumar chuan kumin inthlanah hian vote nei thar mi nuai 60 an awm thu a sawi a, a ṭum khatna atana vote thlak tur zingah hian kum 18-19 inkar mi nuai 15.42 an awm a ni. Mahni nihna thlak, transgender inti mi 4,500 an awm bawk.

Inthlan neihna tur, assembly constituency 224 tinah hian chawhrualin vote nei nuai 2.18 zel awm ang a ni.

State sorkar chuan vote nei chinte chu inthlanna a vote thlak vek tura sawmin beihpui a thlak dawn a, hemi atana hmalaknaah hian cricket captain Rahul Dravid chu 'state election icon' atan ruat a ni.

Vote thlak pawimawh zia mipuite hrilhhriat leh zirtirna kawng khat atan election anthem pawh Kannada film director leh lyricist Yograj Bhat chuan a siam dawn bawk niin Kumar chuan a sawi.