Rahul Gandhi-a'n Jammu tlawh dawn ; BJP-in mega outreach programme huaihawt tum

Congress party hruaitu Rahul Gandhi chuan vawiin hian Jammu a tlawh dawn a. Katra-a Mata Vaishno Devi shrine tlawh a tum.

Rahul Gandhi hian Katara hi a pan tlang nghal dawn a, Mata Vaisho Devi malsawmna a lak hnuah September 10 hian Jammu-a political programme buatsaihah hun a hmang dawn a ni. Hemi hnu hian Jammu-a an party worker leh hruaitute hmaah thu a sawi leh ang.

Congress chuan Rahul Gandhi-an Jammu a tlawh tur hi party chhunga boruak zuai tak awm mek tana phurna thar rawn siamtu anih leh theih an beisei tih an sawi. Gandhi hian thla hmasa khan Kashmir valley an lo tlawh tawh a, BJP kaihhruai NDA sorkarin J&K special status pekna, Article 370 a tihtawp sak hnua a zin ṭum hnihna tur a ni.

Hetih lai hian Bharatiya Janata Party (BJP) chuan Congress tih el nan Rahul Gandhi zin chhung vek hian Jammu and Kashmir-a an party dinhmun ṭhatzia lantirna hun hman an tum ve bawk.

"Jammu and Kashmir-a Rahul Gandhi lo zin tur hi kan lo lawm e. Rahul Gandhi a lo zin apiang hian Congress hi an kehchhia a, BJP hi kan chak sawt ṭhin a ni," tiin J&K BJP chief Ravinder Raina chuan a sawi.

BJP chuan thuchhuah siamin outreach programme pual hian Jammu and Kashmir hmun hrang hrang tlawh turin union minister te chu an kalchhuak dawn tih alo sawi tawh a ni.