CBSE in exam buatsaih tha dawn

Central Board of Secondary Examination (CBSE) chuan Class X Mathematics leh Class XII Economic paper chu exam neih hmaa a put ruk avangin a exam ṭhat tir leh dawn a, exam neih hun tur hi karleh Thawhṭanni-ah a puang ang.

Paper putru chung-chang chhui tur hian Special Investigation Team pawh din ni tawhin, he thilah mawhphurtua ber puh, Rajinder Nagar-a coaching centre neitu, Vicky Wadhwa pawh hrengin thu an zawtfiah tawh a ni. Vicky hian WhatsApp aṭangin zawhna hi a dawng niin a sawi. Vicky leh a thurualpuite chuan question paper hi Rs 10,000–Rs 15,000 in an hralh a ni.

Crime Branch official-te chuan question putru kaihhnawihah hian mi 25 thu an zawtfiah tawh a, an zingah hian school naupang 11, college zirlai pasarih, private tutor panga leh midang pahnih an tel. Ningani zan khan mi pakua thu zawhbelh leh an ni bawk.

Class X Maths exam neih hma ni, March 27 khan CBSE chuan email dawngin, paper leak hi a thlalak te thawn an ni. Email-ah hian he thilah mawhphurtu chu Vicky Wadhwa bakah school pahnih niin an sawi. March 26 khan Class XII economics paper chhanna kuta ziak phek li awmna envelope chu Delhi-a Rouse Avenue-a CBSE Academic unit-in a dawng bawk a ni.

Zirlaite chuan question putru avanga CBSE in exam ṭhat tir a tum chu duh loin, ramchhung hmun hrang hrangah lungawi lohna an lantir. Zirlaite chuan CBSE tihdik loh avanga zirlaiten a tuar chu an duh loh thu an sawi. Delhi-a Jantar Mantar-a lungawi lohna lantira pungkhawm zirlaite chuan CBSE chu paper a putruk lohna turin a tir aṭangin a fimkhur tur a ni tiin, paper a putru a nih chuan zirlaite thiam loh a ni lo a, exam nawn tir an ni tur a ni lo, an ti. Exam ṭhat tir an nih chuan exam dang atana an inbuatsaihna thlengin a nghawn dawn niin an sawi bawk.

Kuminah hian CBSE exam tur hian zirlai nuai 28 chuang an in register a, heng zinga 16,38,428 chuan Class X exam in, an vai hian Maths paper hi an exam ṭhat leh a ngai dawn a ni. Class XII exam-a inlan, zirlai 11,86,306 zinga nuai thum chuang chuan Economics subject lain, an ni pawhin an exam ṭhat leh vek a ngai dawn bawk.

HRD Minister Prakash Javadekar chuan zirlaite harsatna tawh leh lungawi lohna chu a hriatthiampui thu a sawi a, amah ngei pawhin hrehawm a tih thu leh, zan eng emaw zat a mut ṭhat theih loh phah thu a sawi.