India mite ruang la turin Iraq-ah VK Singh a kal dawn

Minister of State for External Affairs VK Singh chuan Iraq-a Islamic State (IS) firfiakten an thah, India mi 39-te ruang la turin naktuk hian Iraq a pan dawn.

Kum 2014 khan Iraq-a Mosul khawpuiah IS firfiakte chuan India mi hnathawka awmte chu an rubo a, an zinga pakhat chu a tlanchhuak a ni. Midangte hi hun rei tak an chin hriat a nih loh hnuah firfiakte hian an tihlum tih hriat a ni. Ruangte hi hmuh an nih hnuah an DNA sample lain, India mi rukbote hi an ni tih hriatchhuah a ni ta a ni.

IS kut aṭanga tlan chhuak, Gurdaspur mi Harjit Masih chuan firfiakte hian an mi man dangte hi an that niin a sawi a, mahse hei hi sorkar laipui chuan a pawmsak lo a, India mi rukbote an la dam a ni tiin an awmna chin hriat tumin hun eng emaw chen a lo bei tawh a ni. India mite an zawnna kawngah hian pui turin Iraq pawh a ngen bawk. Mahse tunhnai khan External Affairs Minister Sushma Swaraj-i chuan India mi rukbote hi tihhlum an nih thu Parliament-ah a sawichhuak a, hei vang hian Congress party chuan sorkar chu sawiselin, mitthi chhungte hnenah hun rei tak chhung chanchin hre chiang si loa beiseina siamsakah a puh a ni.