ECI-in political party register tihtawp theihna dil

Election Commission of India (ECI) chuan kum tam tak chhunga inthlannaa ding tawh lo, political party-te register tihtawp sakna tura thuneihna pe turin Law Ministry hnenah ngenna a thlen.

Assembly inthlan hmachhawn mai tur state panga an awm avangin ECI chuan political party-te data kimchang zawkte a lakhawm leh a, party hrang hrangte data chu chipchiar zawkin an ennawn mek a ni.

Data ennawnaah hian ECI chuan party register, mahse recognise si loh 2,700 an awm tih a sawi. Heng party-te hian thilpek an dawn aṭangin chhiah an awl a ni.

Representation of the People Act-a Sections 29B & C chuan party-te chu a thlawnin thilpek dawn a phalsak a, mahse party-te hian donation Rs 20,000 chunglam an dawng a nih chuan ECI hnenah an in report-a ngai thung.

IT Act-a13A hnuaiah party-te hi chhiah awltir theih an ni a, he Act hmang hian party te hi house property, a thlawna thilpek, mimal thilpek leh hlawkna lian tham-ahte chhiah awltir an ni.

ECI chuan Act hrang hrang hnuaiah party-te hian an sum hmuh dan hi an puanzar kher a ngaih loh avangin sum hmuhna dik tawk lote a awm thei tih a sawi. Hei vang hian party-te chungchangah thuneihna pe turin law ministry-ah ngenna hi a thlen a, ministry pawhin a ngenna hi ngaihtuah thuai a tum.

State assembly inthlan hmachhawn hmabak Uttar Pradesh-a party ṭhahnem takte chuan he hun hi hman ṭangkai tumin pawisa fai vaibelchhe chuang an fawm khawm mek nia sawi a ni bawk.

Commission hian Article 324 hnuaiah party hming chu list aṭan gin an paihsak ṭhin a, hei chauh hi ni loin register paihsak theihna thlenga thuneihna hi pe turin a dil a ni. February 2016-December 2016 chhung khan ECI chuan registered unrecognised political party 255-te chu list aṭangin a lo paih tawh a ni.