Sorkar laipuiin textile sector tan PLI scheme Rs vbc 10,683 pawmpui

Sorkar laipui chuan Nilaini khan textiles sector tihlen leh thuam chakna turin production-linked incentive (PLI) scheme a pawmpui.

He scheme hnuaiah hian kum nga chhungin sector hnuaia an thil siamchhuah tihlenna turin Rs vaibelchhe 10,683 pekchhuah a ni dawn a ni.

Prime Minister Narendra Modi kaihhruaia meeting neihah he scheme hi pawmpui a ni a, meeting zawha media mite an kawmnaah union minister panhnih Piyush Goyal leh Anurag Thakur-te chuan he hmalakna hnuaiah hian ramchhunga textile sector hnuaia thil siamchhuah leh thawnchhuahte tihlen ani thei dawn tih an sawi.

PLI scheme in sector tana hamṭhatna a thlen tur te :

*He scheme hnuaiah hian puantah MMF (man-made fibre), MMF fabric leh technical textile kutchhuak sawm thlanchhuahte tihlenna turin hma an la ang.

*He hmalakna atan hian kum nga chhung Rs vaibelchhe 19,000 invest a ni ang.

*He scheme hmang hian direct-in hna thar nuai 7.5 chuang siam belh a ni dawn a, heng kaihhnawihah hian hna thar dang nuai chuang siambelh a ni bawk dawn a ni.

*India company-te chu khawvel huapa a ṭha ber ni turin a pui ang.

*Scheme hian hmeichhe tam zawk tan huamzau zawka an tel ve theihnan hma a sial sak dawn a ni.

*Aspirational district leh tier-3 leh tier-4-a khuate tan hmanrua changkang leh tunlai zawk an neih theih nan hma an la ang.

*PLI scheme hian Gujarat, Uttar Pradesh, Maharashtra, Tamil Nadu, Punjab, Andhra Pradesh, Telangana, Odisha state te tan hamṭhatna nasa zawk a thlen dawn a ni.

*Textile tana PLI scheme siam hi union buget 2021-22-a sector 13 tana Rs vaibelchhe nuai 1.97 siam tur scheme puan zingah a tel.