Delhi-ah August thlaah mi nuai 1.8 chuang pawisa chawitir ; Pawisa chawitir tling khawm Rs vcb 32.41 a tling

Delhi Revenue department leh Delhi Police-te chuan August thla chhung khan Covid-appropriate behaviour zawm lo leh inkaihhruaina dan an siam hrang hrang zawm lo mi nuai 1.8 an man a, an mi mante pawisa chawitir tlingkhawm hi cheng vaibelchhe 32.41a tling.

Delhi Disaster Management Authority(DDMA) chuan district magistrate leh deputy commissioners of police, deputy commissioners of civic bodies leh officer dangte hnenah Covid-appropriate behaviour; market, mall, restaurant, bus leh railway station-a Covid-19 inkaihhruaina dan siamte kengkawh turin thuneihna a pe a ni.

Revenue department team 150 chuangte leh Delhi police team-te chuan August thla chhung khan dan zawm lo mi nuai 1.80 chuang an man. Revenue department chuan mi nuai 1.50 chuang an man laiin police-te chuan mi 29,000 chuang an man bawk a ni, tiin official-te chuan an sawi. Revenue department hian pawisa an chawitirna aṭangin Rs vaibelchhe 26.74 an hmuchhuak a, hei bakah hian mask vuah lo, punkhawmna huaihawt, vantlang hmuna chilchhak te lakah FIR 4,818 an ziahlut hman bawk.

Delhi Police-te hian dan zawm lo pawisa chawitirna tling khawm aṭangin Rs vaibelchhe 5.6 hmuchhuakin, Covid kaihhruaina zawm lo mi 3,838 an man bawk. Revenue department-a enforcement team-te chuan May thla chhungin Covid kaihhruaina dan zawm lo te chungah challan 85,000 a pekchhuah aṭangin Rs vaibelchhe 15.16 an hmu let bawk a ni. June thla khan dan zawm lo mi nuai 1.58 hnen aṭangin Rs vaibelchhe 25.19 hmuhchhuah a ni a, July khan challan nuai 2.11 an pekchhuah aṭangin Rs vaibelchhe 36.21 an hmuchhuak a ni.

Delhi Policete'n May thla chhung khan dan zawm lo mi 83,000 an man a, June thla khan mi 50,000 leh July khan mi 39,000 an man. May thlaa dan zawm lo hnena pawisa an chawitir zat tling khawm chu Rs vaibelchhe 15.94, June-ah Rs vaibelchhe 10.16 leh July khan Rs vaibelchhe 67.5 a tling.