Covid vaccine dose khat lakin thihna lakah 96.6% leh Dose hnih lakin 97.5% a veng thei : Sorkar laipui

Union health ministry chuan India ramah Covid vaccine dose khatna lak chuan hri vanga thihna thleng tur lakah 96.6% leh, dose hnih lak chuan 97.5% a veng thei tih a sawi.

April-August data zirchianna neih a nih hnuah vaccine lakin hri vanga thihna thleng thei a ven theih dan hi ministry chuan a sawi a ni.

Official-te chuan vaccine lak dan kim­changte, vaccine dose kima la tawh zingah hri kai, breakthrough infection awm leh hri thihpui zat chhinchhiahna, vaccine tracker thar an tlangzarh thuai dawn tih an sawi bawk.

"Vaccine lak zawh hnua hri kai leh, thihpuite hi uluk zawkin an dinhmunte zirchian a ni dawn a, mipuite hmuh theih turin health ministry website-ah tarlan thuai a ni dawn a ni," tiin union secretary for health and family welfare Rajesh Bhushan chuan a sawi.

Data hi sorkarin Covid-19 vaccine chung­changa chhinchhiahna a neih hrang hrangte aṭangin lakkhawm a ni ang.

"India Covid-19 vaccine tracker hi CoWIN, Covid-19 India Portal,health and family wlfare ministry Covid-19 testing portal leh Indian Council of Medical Research (ICMR)-te data lakkhawm hmangin siamchhuah kan tum a ni.. Heng data te hi ICMR identification number leh beneficiaries-te mobile number behchhana lakkhawm an ni," tiin ICMR director general Balram Bhargava chuan a sawi.

"Vaccine dose khatna kan lak zawh hian hri vanga thihna thleng thei laka min venna chu 96.6% leh dose hnihna kan lak zawhah 97.5% a ni. Hri laka thihna thleng thei laka min ven theihna hi kum bithliah tinah a awm vek a; kum 60 chunglam an ni emaw , kum 45-59 inkar emaw kum 18-44 emaw an nih pawhin a danglam chuang lo . Data pathum kan chawhpawlh hnuah hian age group tinah an hnathawh hi a ngai reng a ni," a ti.

"Data aṭanga a lan danin, Covid-19 vaccine dose pahnih kan pek hian natna khirhkhan tak leh thihna lakah min veng thei. Data hmasaa kan lo tarlan tawh angin dose hniha lak hi a ṭangkai takzet a ni. Covid-19 lakah dose bikima lak a pawimawh tluk zet hian dose khatna pawh hian dose hnihna tluk zetin natna leh thih theihna lakah min venghim ṭha a, min ven theihna hi 90% leh a chunglam chuang a ni," tiin Niti Aayog member (health) VK Paul pawhin a sawi.

Covid-19 dona kawngah vaccine hi hun lo kal zel tura hripui leng chhutchahna hmanrua ṭangkai ber a la ni tih a sawi bawk.

Covid-19 kai tawhte'n vaccine an lak dan tur chungchang an zawhnaah Bhargava chuan vaccine an lak leh ngei a ṭul thu a sawi."Inkaihhruaina kan siam angin, Covid-19 hri laka fihlim tawhte chuan thla thum hnuah vaccine an la thei dawn a ni. Zirchianna kan neih zawha kan hmuhchhuah chu hri kan kai zawha vaccine dose khat kan lak leh vaccine dose hnih kan lak hi a in tluktawk vel a ni. Mahse an course chu an hmang zo ngei tur a ni thung," a ti.

Sorkar data in a tarlan danin, mipui kum 18 chunglam zinga 58% te chuan vaccine dose khatna an la tawh a, an zinga 18% te chuan dose hnihna an la tawh bawk.