Gujarat CM thar atan Bhupendra Patel ruat

Gujarat chief minister a nihna aṭanga Vijay Rupani-a'n banna a thehluh tukah amah thlaktu atan senior BJP leader Bhupendra Patel chu ruat fel nghal a ni.

Nakkum maia state assembly inthlan hmabak, Gujarat CM a nihna aṭanga banna hi Rupani hian Inrinni khan a thehlut a, thla ruk chhunga BJP chief minister ṭanglai zinga banna thehlut palina a ni.

CM-in banna a thehluh tak avangin rorellai BJP hian duhthlan tur pathum a nei a, CM thlaktu tur ruat, President's Rule-a awm emaw a hun hmaa inthlan buatsaih emaw a ni. Mahse thil dang buaipui loin CM thar ruat hi an tum a ni.

Nimin tlai khan BJP legislature party meeting neiin, hetah hian CM thlaktu tur hi an thlang a ni. Central-a BJP hruaituten union minister pahnih, Pralhad Joshi leh Narendra Singh Tomar tirin anni hian meeting-ah hruaitu thar tur hi an thlanpui nghal bawk.

Party legislature meeting-ah hian Rupani pawh a tel a, CM thar atana ruat chu a thlawp thu a sawi bawk. A hmaa CM thlaktu tura hming lam rik zingah Bhupendra Patel hming hi a lang hran lo a, mahse prime minister Narendra Modi leh union home minister Amit Shah-ten Gujarat hruaitu thar atana an duhthlan nia sawi a ni.

Gujarat CM thar atana ruat, Patel hi Ghatlodia bialtu MLA a ni a, Ahmedabad Municipal Corporation leh Ahmedabad Urban Development Authority-ah a tel mek a ni.

Rupani hian CM aṭanga banna a thehluh chungchangah, "PM Modi kaihhruaina hnuaiah Gujarat chuan kum nga chhungin hmasawnna kawng an zawh a ni. State tihhmasawn lehzual turin Chief Minister ka nihna angin banna kal thehlut ta a ni," tiin "Kan hriat tlanglawn ṭheuh angin BJP party chu mamawhna ang zelin an inthlak ṭhin. Party-a thawktute'n theihtawp kan chhuah ṭhinna hi kan danglam bikna a ni a, keipawn theihtawp chhuahin party tan ka thawk zel dawn a ni" tiin a sawi.

Hethi lai hian central lama BJP hotute chu Rupani hnathawh dan chuan an mit a tlung tawk lo a, nakkuma state inthlan an hmachhawn dawn avangin a lakah rinna an nghat ngam tawhlo nia sawite a awm bawk. July thla khan BS Yediyurappa pawh duh khawp lohna a awm avangin Karnataka Chief Minister a nihna aṭangin a bang, hemi hma hian Tirath Singh Rawat pawh Tirvendra Rawat a thlak aṭanga thla li hnu lekah Uttarakhand CM a nihna aṭangin a lobang tawh bawk a ni.

Kum 2019 assembly inthlanah khan BJP hian Assembly seat 182 aṭangin seat 99 an la, kum2012 ai khan seat 17 in an la tlem zawk a. Congress chuan inthlan hmasa aiin seat 16-a la hnem zawkin, seat 77 an la thung a ni.