AAP national convenor atan Kejriwal thlang nawn

Delhi chief minister Arvind Kejriwal chu nimina Aam Aadmi Party (AAP) national executive meeting-ah chuhtu awm loin national convenor atan thlan nawn a ni.

AAP secretary atan Pankaj Gupta leh treasurer-ah ND Gupta-te thlan an ni bawk.

Party national council hian executive body member atan Inrinni khan mi 34 a lo ruat tawh bawk. An zingah hian Kejriwal bakah Delhi deputy minister Manish Sisodia, Delhi Legislative Assembly deputy speaker Rakhi Birlan bakah state assembly inthlan hmabak, Gujarat, Punjab leh Goa-a hruaitute pawh an tel.

AAP chuan Delhi pawn lamah an huang zauh zel an tum a, Punjab, Uttarakhand, Goa, Uttar Pradesh leh Gujarat inthlan awm turah hlawhtlinna chan ngei tuma beih an tum a ni.

Inrinnia national council meeting-a thu a sawiah Keijriwal chuan party-a chanvo neih chungchangah huamhauh lutuk lo turin a chah a, duhawmna chuan eng hlawhtlinna mah a thlen dawn lo tih a sawi. An hna thawhte chu a ṭha tawk tur a ni tiin, nihna duh vang ngawta thawk lo turin a ti a, an thawh ṭhat chuan chanvo chu an chelh chho mai dawn a ni, a ti. "Kan hnenah rawn kala party ticket emaw, position emaw in duh tih in rawn sawi a nih chuan, chu dinhmun chu in phu lo tihna a ni zawk ang," tiin a sawi.