Odisha CM-i'n loneitute tan Rs vbc 742.58 semchhuak

Nuakhai festival denchhenin Odisha chief minister Naveen Patnaik chuan loneitute 37,12,914 te ṭanpuinan Inrinni khan KALIA (Krushak Assistance for Livelihood and Income Augmentation) scheme hnuaiah cheng vaibelchhe 742.58 a sem chhuak. He scheme hnuaia hamṭhatna dawngtute account-ah Rs 2,000 ṭheuha pek an ni.

"Loneitute harsatna hi kan zaa harsatna a ni, state pum harsatna pawh a ni tel a ni," tiin Patnaik chuan a sawi.

Chief Minister chuan sawi chhunzawmin, "Loneitute hi tuman kan hnualsawt thei loa, kan sorkar chuan sorkar laipui nena ṭangdunin harsatna sutkian dan kan zawng mek zel a ni," a ti.

Kumina ruahtui tlak ṭhat loh avanga loneitute harsatna an tawhte sawiin, CM chuan kum dang aiin August-ah ruah tui a tla ṭha lo hle a, mahse ruahtui a tlak chhunzawm zel chuan an dinhmun chuan ṭhat lam a pan leh mai a rin thu a sawi bawk. Thil awmdan chu sorkar chuan uluk takin a thlithlai reng tih a sawi.

CM chuan KALIA scheme chu loneitute tan ramchhunga scheme ṭha ber a nih thu leh, Odisha chauh hi ramchhunga ram nei ve lo loneitute tana chhawmdawlna pe thei awmchhun a ni, a ti. He scheme kaltlang hian loneitu tenau zawk nuai telin hamṭhatna tamtak an dawng a ni, a ti.

Patnaik chuan Covid hripui a len tirh aṭang khan state sorkar chuan he scheme kaltlangin loneitu hnenah Rs vaibelchhe 3,200 chuang an pe tawh tih a sawi.