Advertisment dik lo tichhuakah UP sorkar puh

Uttar Pradesh sorkar chuan an state hmasawnna lantirna advertisement a tihchhuahah, Kolkata flyover thlalak a hmang nia puh a ni.

Pathiannia Eng­lish chanchinbua 'Transforming Uttar Pradesh Under Yogi Adityanath' tih hmanga full page advertisement a tihchhuahah, CM Yodi Adityanath thlalak leh Kolkata-a Maa flyover nen inang tak thlalak a dah a, hei hi social media lamah sawizui a hlawh hle.

Advertisement-a thlalak an dah chung­changah Congress general secretary Priyanka Gandhi Vadra chuan CM Adiyanath chu sawisel nghalin, "Advertisement lem an siam a, ṭhalaite hna lem an an tiam bawk. Mipuite harsatna an hrethiam pha lo emaw engatan mah an ngai lo emaw tihna a ni. Sorkar hian advertisement lem leh intiamkamna dik lo min pe a ni," tiin twitter kaltlangin a sawi.

West Bengal-a ro­rel­lai, Trinamool Cong­­ress (TMC) pawhin advertisement chungchang hi sawichhuakin, BJP chuan West Bengal chief minister Mamamta Banerjee kaihhruai sorkar hnuaia hmasawnna hrang hrang thlengte chu a pawmpui tih an lantir a ni, an ti.

Bengal transport minister Firhad Hakim chuan, "Kolkata hmingthanna, Maa flyover thlalakte Uttar Pradesh-a an sak ni awm taka an tarlan avang hian BJP sorkarin mi bum a tum a ni. Mamata Banerjee kaihhruaina hnuaia West Bengal hmasawn dan leh entawn an tum zia a ti lang a ni," tiin "Midang thiltih kan entawn hi kan ngaihsan zia tih kan lantirna ani tih hi ka hre reng ṭhin , mahse Yogi Adityanath hi chuan a ti mah mah a ni! Mamata kaihhruaina hnuaia hmasawnna hnathawh thlalak an ta ang maia an tarlang duh hi an pawl tihsual palh a ni lo a, UP state dinhmun dik tak pholang tu a ni", tiin a sawi.