Covid-19 kai thar 27,254 awm belh leh ; Inrinni aiin 4.6% in hri kai tlem zawk

India ramah Pathianni khan hri kai thar 27,254 an awm belh leh a, Inrinni (28,591) ai khan hri kai hi 4.6% in an tlem zawk a ni. Covid-19 vanga thi 219 an awm bawk.

Test positivity rate chu 2.6% ni mekin, ni 14 chhung 3% hnuailamah a awm tawh.

Kerala chuan Covid-19 kai thar ngah berin mi 20,240 an awm a, state hian hri vanga thi 67 an nei bawk a ni.

Tamil Nadu-ah Covid kai 1,608, Andhra Pradesh (1,190) leh Karnataka (803)-te chu chhimlam state zinga nikhata hri kai tamna te an ni. Telangana-ah hri kai thar 249 an awm.

Covid hri len tirh aṭanga kai tamna ber Maharashtra erawh chuan hri kai thar panga chiah an nei tawh a, hri vanga thi 46 an awm thung a ni.

State lian pali - Rajasthan, Gujarat, Madhya Pradesh, Bihar-ah chuan Pathianni khan Covid-19 vanga thi an awm lo a, Chhattisgarh leh Jharkhand-ah pawh hri vanga thi an awm lo bawk.

Delhi-ah hri kai thar 22 an awm a, hri vanga thi an nei lo. Khawpui chhunga test positivity rate chu 0.04% a ni. Delhi-ah hian September 7-a hri vanga thi pakhat bak thihpui an la awm leh lo.

Goa sorkar chuan Kerala aṭanga haw leh zinte chu ni nga chhung inkhung hrang turin a ti a, a bikin zirlai leh hnathawkte chu fimkhur zual turin a chah bawk. Pathiannia thuchhuah an siamah, Goa sorkar chuan state pumah September 20 thleng curfew a puang a, mipui chetvelna tam tak chu khuahkhirhna hnuaiah dahin, casino-te pawh khar turin a ti.

Pathiannia Covid-19 kai thar 541 awmna Mizoram chu hmarchhak state zinga hri kai hmuhchhuah tam berna a ni a, Covid vanga thi pahnih an awm bawk.

Finance Minister Nirmala Sitharaman chuan Pathianni khan ram eibar tundinna kawng awmchhun chu vaccine semchhuah hi a ni a, vaccine an semchhuah zel chuan mipuite chu an hna ngai an thawk leh theih dawn a, loneitute pawhin an lo hnathawh an chhunzawm theih phah dawn a ni, a ti.

Ramchhungah Covid-19 vaccine vaibelchhe 74 chuang semchhuah a ni tawh tih Union Ministry of Health chuan Pathianni khan a sawi. "India chuan Covid-19 a dona kawngah hlawhtlinna hmel a hmu leh ta. Covid vaccine vaibelchhe 74 semchhuah a ni tawh," tiin Ministry chuan twitter kaltlangin a sawi.