CBSE paper leak : Zirtirtu pahnih leh tutor pakhat man

Central Board of Secondary Education (CBSE) hnuaia Class X leh Class XII question paper putru chungchang chhuina kal zelah, nimin khan Delhi Police-te chuan zirtirtu pahnih leh tutor pakhat an man.

Delhi Police-te chuan nimina an mante hi Class XII Economics paper putru print chhuah a nih chungchangah man an ni tih an sawi a, hetihlai hian exam zawhna tur kutziaka lo thehdarh chu chhui mek zel a ni thu an sawi bawk.

Police-te'n an mante hi Delhi dai, Bawana-a Mother Khazani Convent School-a zirtirtu, Rishabh leh Rohit an ni a, examination neihnaah duty tura dah an ni bawk. Heng mi pahnihte hian tutor pakhat, Tauqir hnenah official-a exam neihnaah paper an semchhuah hma minute 25-ah question print sa copy chu an pe nia sawi a ni. Hemi hnu hian Tauqir hian paper thlalak hi WhatsApp kaltlangin a thawndarh a ni.

Exam question leak kaihhnawihah hian mi 12 man an ni tawh. Inrinni khan mi pathum man an ni a, Jharkhand-ah kum tling lo mi pakua hren an ni bawk.

Delhi Police-te chuan mi 60 chuang thu an zawtfiah tawh a, an zingah hian zirlai 53 leh zirtirtu pasarih an tel. CBSE chairperson hnenah email hmanga Class X Mathematics paper leak chungchang thawntu pawh Google hmanga zawnchhuah sak tura an ngenna chu chhanna an dawng tawh bawk a ni.

Crime Branch-a officer pakhat chuan Class X zirlai pakhatin Mathematics paper hi WhatsApp-ah a dawng a, hemi hnu hian a pa email ID hmangin CBSE chairperson hi a thawn a ni. An pafa hian thu zawhfiah an ni tawh bawk.

Class X Mathematics leh Class XII Economic paper putruk chungchangah hian Delhi Police-te chuan March 27 leh March 28 khan thubuai an ziak lut tawh a ni.

Paper putru pahnihte hi CBSE chuan exam ṭhat a ni dawn tih a sawi a, hei hi duh loin ramchhung hmun hrang hrangah zirlaiten lungawi lohna an lantir a ni. Hemi hnu hian Union Human Resource Development Minister Prakash Javadekar chuan Class X Mathematics paper chu Delhi leh Haryana-ah chuah exam ṭhat a ni dawn tih a sawi. CBSE hnuaia Class X zirlai nuai 16 zinga nuai 14 vel chuan exam hi an beih nawn a ngai dawn a lo a ni. Mahse Class XII Economics paper erawh chu ram pumah exam ṭhat a ni tur thu a sawi.