Britain-Russia inkar chhe zel

England-a Russian spy hlui leh a fanu tur hmanga beih an nih chungchangah Britain-in Russia sorkar inrawlha a puh avangin ram pahnihte inkar boruak a chhe chho zel.

Britain chuan Russian spy hlui te pafa beih an nih avang hian an rama Russia palai awmte chu a lo hnawtchhuak tawh a, hemi hnu hian Russia pawhin Britain palai leh technical staff 50 chuang a hnawtchhuak ve leh tawh bawk.

Russian spy hlui Sergei Skripal leh a fanu, Yulia te Salisbury khuaa March 4-a tur hmanga beih an nih chungchangah khawthlang ram dangte pawhin Britain hi thlawpin, an rama Russia palai awmte an lo hnawtchhuak tawh bawk. Europe ram hrang hrang leh US aṭanga Russia palai hnawhchhuah hi 100 an chuang tawh a ni.

Skripal-te pafa chunga thil thlengah hian Russia chuan inrawlhna a nei lo tih a sawi a, hemi chungchangah hian Russia Foreign Ministry chuan Inrinni khan Britain Foreign Office hnena zawhna a neih 14 list pawh a tichhuak a ni. Russia chuan London-a Russian thlawhtheihna, khualzin phur dap a nih chungchang pawh sawifiah turin Britain a phut bawk.

Kar kalta Zirtawpni khan Heathrow airport-ah Russia thlawhtheihna, Aeroflot chu dap a ni. Russia chuan khualzin phur thlawhtheihna hi dap a nih hnuah British officer-te chuan an dapna chhan sawifiahna document pawh engmah an pe duh lo nia sawiin, he thil thleng hi inrahbehna leh inzahlohna lian tak lantirna a ni, a ti. He thil thleng hi Russia laka British sorkar policy nen pawha inkaihhnawihna nei nia an ngaih thu a sawi bawk.