Lucknow-Jhansi inkarah BrahMos cruise missile siamna din dawn

India leh Russia ṭangkawpin an siam, supersonic cruise missile - BrahMos chu Uttar Pradesh-ah a siamna hmun dah a ni dawn.

Report ṭhenkhatin an tarlan danin, BrahMos missile siamna hmun hi Lucknow, Kanpur leh Jhansi inkarah siam a ni dawn a, a senso atan Rs vaibelchhe 300 ruahman a ni. BrahMos project hmang hian mi 5,000 velin hna thar an neih phah theih dawn a, mi 10,000 bawr velin production centre kaltlang hian hna an nei bawk ang.

Brahmos Aerospace hi Defence Research and Development Organisation (DRDO) of India leh PO Mashinostroeyenia (NPOM) of Russia ṭangkawpte hmalaka niin, Uttar Pradesh-a Lucknow bula modern manufacturing facility din turin rawtna an thlen a ni.

BrahMos Aerospace director-general Sudhir K Mishra kaihhruain top-level palaite chuan UP chief minister Yogi Adithyanath chu hmuin, state chhunga manufacturing facility lian tak din tur leh missile system din tura hmanrua ṭul ang ang bun a nih theihnana an ruahmannate an sawipui .

Mishra hian UP Expressway Industrial Development Authority (UPEIDA) CEO leh Additional Chief Secretary (home) Awanish Awasthi hnenah lehkha thawn bawkin, BrahMos missile siamna atan ram acre 200-a zau an mamawh thu a thlen a ni. Uttar Pradesh sorkar hian BrahMos missile siamchhuahna chu Lucknow-a Defence Corridor-ah a din ngei dawn tih a sawi bawk.

BrahMos missile siamchhuah bakah hian research leh development hna pawh unit-ah hian thawh nghal a ni dawn, kum thum chhungin BrahMos missile 100 chuang siamchhuah hman an tum a ni.

Kum 2018 January thla khan prime minister Narendra Modi chuan investors' summit-ah UP-a Defence Corrridor siam anih tur thu hi a lo puang tawh a, a hnuah UP sorkar chuan defence corridor-te hi Lucknow, Kanpur, Chitrakoot, Jhansi, Agra, leh Aligarh nodes-ahte siam a nih thu a sawi ve leh bawk.