Dalit-ten Bharat Bandh huaihawt

Dalit hnam pawl hrang hrangte chuan nimin khan ram pum huapa nawrh, Bharat Bandh an huaihawt. Nawrh huaihawt vang hian Punjab, Bihar leh Odisha-ah rel service tihtawp a ngaih phah a ni.

Dalit pawlte hian Supreme Court-in Scheduled Caste and Scheduled Tribes (Prevention of Atrocities) Act siamṭhatna tura rawtna a siam chu sut an phut a ni. Sorkar laipui pawhin Supreme court-ah hian review petition a thehlut bawk a, court-in SC leh ST mite kutthlak leh tinawmnah tua puhte man leh thubuai siamsak nghal ṭhin titawp tura thupek a siam pawh ngaihtuah ṭha turin a ti a ni. He dam siamṭhat tum hi Dalit-te chuan na takin an lo sawisel tawh a ni.

Supreme Court chuan sorkar hnathawkte chu thuneitu pawmpuina lo chuan thubuai siamsak theih mai ani dawn lo tih a sawi a, hei bakah hian private citizen-te pawh dan ang taka an chungthu chhui chian a nih hnuah chauh man theih an ni ang, a ti. Hei bakah hian a chhui chian hna hi Deputy Superintendent of Police in a thawk ang a ti bawk. Court chuan dan siamṭhat a ngaihna chhan chu he Act hmanga dik lo taka sorkar hnathawk rinawm takte beih an nih ṭhin venna tur niin a sawi.

Dalit pawl hrang hrang leh political party-te chuan SC/ST Act siamṭhat tum dan hi an duh lo a, hei hian Dalit hnamte laka tharum thawhna thleng ṭhinte a tihhluar phah zawk an hlauhthawn thu an sawi a ni.

Nawrh huaihawt hian Punjab, Bihar leh Odisha-te a nghawng buai hle a, rel kawngte dan anih avangin hmun tam takah rel service pawh a khaihhlak phah hle. Madhya Pradesh-a Gwalior leh Morena-ah chuan buaina a chhuah avangin curfew puan a ni a, buaina chhuakah hian mi pakhat a thi a ni.

Uttar Pradesh-ah pawh Agra leh a bul hnial bialah te nawrh huaihawt leh police-te inkarah buaina a chhuak bawk. Nawrh huaihawtte hian car leh sorkar hmunte an suasam a, police-te leh mipuite hi hnawrhdarh tumin an innawr buai a ni. Chief Minister Yogi Adityanath chuan mipuite chu buaina siam zawnga che lo tur leh, an thil phutte pawh sorkarah ṭha taka thlen turin a ngen. UP CM chuan sorkar laipui leh state sorkar-te chuan hnam hnuaihnung zawk leh SC leh ST-te hamṭhatna tur chu an ngaihtuah reng a ni tih a sawi.

Bihar leh Jharkhand-ah pawh nawrh huaihawtte hian rel kawng an dang a, rel service a bahlah phah nasa hle. Ranchi-ah chuan pungkhawmte chu police-ten tiang nen hnawhdarh tumin an bei a, an innawr buai a ni.

Rajasthan-ah pawh rel kawng dan a ni a, dawrte suasam a ni bawk. Barmer-ah pawh nawrh huaihawttute chuan sorkar building-te tichhiain, car an hal bawk.

Dalite-te chuan Haryana leh Punjab-ah pawh khawpui hrang hrangah kawng an zawh a, buaina nasa zawk a chhuah venthawn thilah Punjab sorkar chuan zirna inte a khar tir a, bus service pawh titawpin, mobile leh internet service-te tihtawp a ni bawk a ni.