Kejriwal-an Jaitley-a hnenah ngaihdam dil

Delhi Chief Minister leh Aadm Aadmi Party hotu, Arvind Kejriwal-a chuan nimin khan Union Finance Minister Arun Jaitley-a hnenah a chungchang thu a lo sawi danah ngaihdam a dil a, a thusawi avang hian pawi a tih thu a sawi nghal bawk.

Arun Jaitley hian kum 2015 khan Delhi District Cricket Association (DDCA) buaina chungchangah Kerjirwal leh AAP hruaitu dang Raghav Chadha, Kumar Vishwas, Ashutosh, Sanjay Singh leh Deepak Bajpai-te chu intihhmingchhiat tuma puhin an lakah defamation case a thehlut a ni.

Nimin khan Kejriwal leh a thawhpui, Sanjay Singh, Ashutosh leh Raghav Chadha-te hian Jaitley-a hi lehkha thawnin, DDCA president a nih laia a chungchang thu an sawi danah pawi an tih thu an hrilh a ni.

Hemi hma hian Kejriwal-a chuan BJP hruaitu, Union Transport Minister Nitin Gadkari-a hnenah a chungthu a sawi dan avangin ngaihdam a lo dil tawh bawk. Gadkari hian Kejriwal-a lakah hian defamation case a lo thehlut tawh bawk a ni. Gadkari hi AAP-in India mi eiru nasa list a siamah an telh a ni. Mahse Kejriwal-an thupha a chawi hnu hian an pahnihin dilna inṭawm siamin, Kejriwal-a laka thubuai thehlut chu sut turin court-ah an ngen.

Kejriwal-a hian ruihhloa sumdawnnaa inhnamhnawiha a puh chungchangah Shiromani Akali Dal hotu Bikram singh Majithia hnenah thupha a lo chawi tawh bawk.