SC-in TN petition thehluh ngaihtuah dawn

Supreme Court-in Cauvery Management Board din tura a hriattirna, sorkar lapuiin a zawm loh chungchangah Tamil Nadu-in petition a thehluh chu court-in ngaihtuah a remti.

Chiet Justice Dipak Misra leh Justice AM Khanwilkar leh DY Chandrachud te awmna bench chuan hemi chungchang hi April 9-a ngaihtuah turin an rel. Bench chuan Tamil Nadu-in tui a indaih loh avanga harsatna a tawh mek chu an hriatthiampui thu sawiin, he buaina hi chinfel thuai an tum tih a sawi.

Tamil Nadu leh Karnataka-in Cauvery lui tui an inchuh chungchanga an buaina chinfel a nih theih nan, February 16 khan Supreme Court chuan sorkar laipui hnenah kar ruk chhung ngeia Cauvery Management Board leh Cauvery Water Regulation Committee din turin a ti a ni. Mahse sorkar laipui chuan hei hi tun thlengin a la tihhlawhtling lo a ni.

Hetih lai hian sorkar laipui chuan CMB din dan tur chungchangah Tamil Nadu leh Karnataka hian ngaihdan in ang lo an nei niin a sawi thung. Karnataka chuan CMB din tura tihna hi a dodal a, an buaina chinfel dan tur thil dang ngaihtuah zawk turin a ti.