Delhi-ah halmawi leh halpuah hal khap

Delhi sorkar chuan nimin khan thuchhuah siamin National Capital Region chhungah Diwali season chhungin halpuah leh halmawi dahkhawm, zawrh leh hal khap a nih thu an tarlang a, hei hi boruak bawlhhlawh lohna tura an tih a ni.

AAP sorkarna hnuaia awm mek Delhi khawpuiah hian nikum lamah khan boruak bawlhhlawh leh Covid-19 darh nasa chu sawi zawm a lo ni tawh. Nikuma Diwali hman zawh a nih hnu ni sarih chhung khan hripui kai an pung nasa hle a, ni khatah mi 6000 chuangte'n an kai hial.

Delhi chief minister Arvind Kejriwal chuan twitter-ah halpuah leh halmawi khap a nih chungchang hi tarlangin,"Kum thum liam ta chhunga Diwali hunlaia Delhi boruak hlauhawm dan thlir chungin, nikum ang bawk khan, kuminah hian halpuah leh halmawi chi reng reng dahṭhata, zawrh leh hal khap a ni," a ti.

Arvind Kejriwal chuan nikum lamah khan khapna thupek an tihchhuah tlai avangin halpuah leh halmawi hal an tam tho tih chu a pawm a, an khap har avangin sumdawng ṭhenkhat chuan halpuah leh halmawi eng emaw zat lo lakhawmin an lo hralh hman tih a sawi.

Nikum Diwali hunlai khan Delhi boruak a bawlhhlawh hle a, boruak mihring tana him china ngaih aiin a let ruk vel zetin nikum Diwali zawhah khan Delhi boruak a bawlhhlawh a ni.

Kumin March thlaah phei kha chuan Delhi khawpui chu khawvela khawpui boruak bawlhhlawh ber a ni hial.