India ramah Covid-19 kai thar 27,176 awm belh leh

A zawnin ni 80 chhung hri kai thar 50,000 aiin tlem tawh.

India ramah Thawhlehni khan coronavirus kai thar 27,176 an awm belh leh a, Thawhṭanni aiin hri kai hi 7% dawnin an tam zawk. Ramchhunga hri kai tawh zat chu 3,33,16,755 niin, hri vanga thi 284 awm belhte nen ramchhunga hri vanga thi zat chu 4,43,497 an tling tawh bawk.

India-ah hian a zawnin ni 80 chhung chu nikhatah hri kai thar hi mi 50,000 aiin an tlem ziah tawh a, ni li liam ta chhung khan nitina hri kai thar hi 30,000 hnuai lam zel a ni tawh bawk.

Hri kai mek, active case chu 3,51,087 ni mekin, hri kai hmuhchhuah tawh zat aṭanga 1.05% an ni. Hetih lai vek hian hri kai dama chhuahtir tawh zat, recovery rate chu 97.62% niin Union Health Ministry data nimin zinga tihchhuah chuan a tarlang.

Kar khat chhunga hri kai hmuhchhuah, weekly positivity rate hi 2% niin ni 82 chhung chu 3% hnuai lamah a awm tawh. Ni khata hri kai thar, daily positivity rate pawh ni 16 chhung 1.69% a ni tawh bawk a ni.

State/UT ten Covid-19 vaccine dose vaibelchhe 4.62 semchhuah mai theihin an kawl tih a sawi bawk.

Thawhlehni khan Kerala-ah chuan Covid-19 kai thar 15,876 an neih belh leh a, state chhunga hri kai mek erawh nuai hnih hnuai lamah an tlathla tawh a ni. Kerala Test Positivity Rate (TPR) chu 19% aṭangin 15.12%-ah a tlathla tawh bawk a ni.