NCRB data : Kum 2020-ah dan bawhchhiatna 28% in a pung

National Crime Records Bureau (NCRB)-in kum 2020 crime data a tihchhuah tharah, India ramah kum 2019 aiin kum 2020-ah dan bawhchhiatna thubuai ziahluh 28% aiin a tam. Mahse a punna tam zawk hi Covid-19 dan bawhchhiatna a ni a, dan bawhchhiatna dangah chuan kum 2019 aiin thubuai ziahluh hi a tlem zawk thung.

Kum 2020 chhungin Indian Penal Code (IPC) crime 42,54,356 leh Special and Local Laws crime 23,46,929 ziahluh a ni. Kum 2019-a thubuai ziahluh zawng zawng 51,56,158 aiin 14,45,127 in a tam zawk. Crime rate ( mi nuai khat zela thubuai ziahluh zat) hi kum 2019-a 385.5 a nih laiin 2020-ah chuan 487.8 a ni thung.

NCRB report chuan, thubuai ziahluh a pun tamna chhan hi IPC Section 188 leh Disaster Management Act hnuaiah sorkar laipuiiin Covid kaihhruaina dan bawhchhiate thubuai siamsak an tam vang niin a sawi.

Gujarat leh Tamil Nadu state-ah IPC crime ziahluh a pung tam bik hle. Gujarat-ah hian kum 2019-ah case nuai 1.39 ziahluh a nih laiin, 2020-ah chuan nuai 3.81 a ni a, a punna hi 174% a tling. Tamil Nadu-ah IPC case hi 2019-a nuai 1.68 a nih laiin 2020-ah nuai 8.91 a tling a, a punna hi 430% zet a ni pha.

Gujarat-ah hian IPC Section 188 hnuaiah Covid kaihhruaina dan bawhchhiat vanga thubuai siamsak nuai 2.27 an awm a, Maharashtra-ah nuai 1.39, Andhra Pradesh-ah 72,183, Uttar Pradesh-ah 40,361 leh Madhya Pradesh-ah 34,753 an awm bawk.

Kum 2020-ah hian Unlawful Assembly (under IPC Sections 143, 144 and 145) case pawh 36% in a pung a, Rajasthan chu a pun tamna ber niin case 3,942 a awm. Tamil Nadu-ah 3,007, Kerala-ah 2,280, Assam-ah 755 leh Maharashtra-ah 748 a awm bawk.

Hripui leng vanga complete lockdown puan a nih chhung, kum 2020 March 25-May 31 inkarah khan hmeichhia, naupang leh kum upa zawkte chunga hleilenna thleng a pung a, rukruk leh inrawkna thleng erawh a tlahniam thung. Tualthah thubuai chu 1% in a pung bawk.

Schehduled Castes leh Scheduled Tribes-te laka pawikhawihna thleng thubuai chu kum 2019 aiin kum 2020-ah 10% dawnin a pung. Scheduled Caste-te chunga pawikhawina thubuai hi 50,291ziahluh niin, 2019 aiin 9.4% a tam zawk. Scheduled Tribes-te beihna thubuai pawh 8,272 ziah luh niin, 2019 aia a punna hi 9.3% a tling bawk a ni.

Environment Related Offences case pawh a kum hmasa aiin nikumah 78.1 in a pung bawk. Kum 2019-ah case 34,676 ziahluh a nih laiin 2020-ah chuan 61,767 ziah luh a ni. The Cigarette and Other Tobacco Products Act hnuaia thubuai ziahluh pawh kum hmasa aiin 80.5% in a tam a, Noise Pollution Acts (State/Central) hnuaia thubuai siamsak pawh 2019 aiin 11.8% in a tam zawk bawk.