India : Social media-a Covid-19 chungchanga thudik lo thehdarh nasa ber

Internet hmang tamna leh internet literacy nei ṭha lo tak India chu social media-a Covid-19 chungchanga thuthar dik lo thehdarh tamna ber ram a ni.

'Prevalence and Source Analysis of COVID-19 Misinformation in 138 Countries'-tih hmanga zirchianna neihah hei hi tarlan niin, he report hi International Federation of Library Associations and Institutions journal-ah tihchhuah a ni.

Ram 138-a thu dik tawk lo tihdarh 9,657 an zirchianna aṭangin he report hi ansiam a ni. Heng thu thehdarhte hi organisation 94-te chuan an rintlak tawk leh tawk lohte an enfiah vek a ni.

"Ram tam tak zingah India (18.07%) chuan social media hmangin thu dik lo an thehdarh hnem ber a, hei hi an rama internet hmangtu tam lam, internet penetration rate san vang te, social media hman nasat vangte leh a hmangtu ten internet literacy an tlakchham vang te a ni,"tiin an tarlang.

India (15.94%), US (9.74%), Brazil (8.57%) leh Spain (8.03%) te chu social media hman dik loh tuar nasa zual ramte an nih thu a tarlang bawk.

"Social media (84.94%) hian thuthar dik lo a tarlang hnem ber a, internet (90.5%) chuan a tlangpuiin Covid-19 thu dik lo a keng hnem ber a ni. Social media platform zingah thu dik lo thehdarh zingah 66.87% hi Facebook kaltlanga thehdarh a ni," an ti.

World Health Organisation chuan Covid-19 chungchanga thu dik tawk lo a darh chak thu leh midang nunna atan a derthawng thei niin a lo sawi tawh a, mipuite chu an thuthar hriatte chik leh zual tur leh, an rintlak tawk em tih ennawn fo turin a lo chah tawh a ni.