Tamil Nadu CM leh dy CM-ten chaw ngheia nawrh huaihawt

Tamil Nadu Chief Minister K Palaniswami leh deputy chief minister O Panneerselvam chuan sorkar laipuiin Karnataka nena Cauvery lui tui an insem tur chungchang buaipuitu, Cauvery Management Board (CMB) a din mai loh avanga lungawi lohna lantirn nimin khan chaw ngheiin nawrh an huaihawt.

Supreme Court-in February 16-a kar ruk chhunga CMB din tura hun a pek chu sorkar laipui chuan zawm loin tun thlengin a la din lo a, hei vang hian Tamil Nadu MP-te chuan Parliament inkhawmah an lungawi loh thu pawh an lo auchhuah pui fo tawh a ni. Sorkar laipui chuan board din nan hian thla thum dang hun pe turin a ngen a ni.

Court thupek a tihhlawhtlin loh avanga sorkar laipui chunga lungawih lohna hi Tamil Nadu sorkar chuan Supreme Court-ah a thehlut a ni.

Tamil Nadu political leader-te chuan Cauvery lui tui inchuh chungchangah BJP chuan Karnataka a duhsak niin an puh. Karnataka hian CMB din hi a duh lo a ni.

Nimina CM leh dy CM-ten nawrh an huaihawt hi AIADMK minister leh hruaitu hrang hrangte chuan an zawm a, hemi hma hian party dangte pawhin lungawi lohna hi an lo lantir tawh bawk. District hrang hrangah minister-te chuan chaw ngheia nawrh huaihawt hi an ho a ni. AIADMK chuan thuchhuah siamin, chaw ngheia nawrh huaihawt chu sorkar laipui laka an lungawi lohna lantirna a nih thu a sawi.

Tamil Nadu-a eptu pawl, DMK pawhin April 5-a Prime Minister Narendra Modi-an an state a tlawh hunah bandh huaihawt an tum bawk.