Rajya Sabha MP tharte rinawmna thu tiamtir

Nimina Rajya Sabha inkhawmah Rajya Sabha MP atana thlan thar zinga mi 41-te chu rinawmna thu tiamtir an ni a, an zingah hian union minister Ravi Shankar Prasad, Prakash Javadekar, Jagat Prakash Nadda leh Dharmendra Pradhan-te an tel.

Thla hmasa khan state 15-a Rajya Sabha member thar tur 58 thlanchhuah a ni. An zinga 17 chuan rinawmna thu an la tiam ve lo a, hengte hi Rajasthan, Telangana leh Odisha aṭanga thlan tlinte an ni a, Uttar Pradesh aṭanga thlan tlin Finance Minister Arun Jaitley pawh a la tel lo.

Nimina member lakluh thar zinga a tam ber hi rorellai NDA member an ni. Rinawmna thu tiamtir an nih hnuah House chairman M Venkaiah Naidu chuan lawmpuina chibai a buk a ni.

Member thar lakluhnaah hian ṭawng chi kua hman a ni a, hei hian India ram chu hnam leh chi hrang hrangte awmkhawmna hmun a nih zia a lantir niin Chairman Naidu chuan a sawi. Member tharte chu mipuite ṭhatna tura thawk a, House zahawmna vawng nung zel tura a beisei thu a sawi.