Mosul-a thi chhungte hnenah Rs nuai 10 pe dawn

Prime Minister Narendra Modi chuan Mosul, Iraq-a Islamic State (IS) firfiakten an thah, India mi 39 chhungte hnenah zángnadawmna cheng nuai 10 ṭheuh pek an ni dawn tih a sawi.

Minister of State for External Affairs, VK Singh chu India mi thahte ruang la tur hian Iraq-ah a kal a, Thawhṭanni khan an ruang la awmte chu special aircraft hmangin a rawn hawn a ni.

VK Singh chuan kum 2014 aṭang khan Ministry of External Affairs kaltlangin ram pawn lama kal turte chu him taka an awm theihna tura kal turin campaign pawh an lo neih tawh tih a sawi. Mipuite chu agent dik lo hmanga kal lo turin an chah fo tih a sawi a, a sawi hun ni lo hle mah se tuna mi 40 ruang a hlawm takte chu sorkar hriatpui loh agent kaltlanga kal an nih avangin eng embassy-ah mah chhinchhiah pawh an ni lo, a ti. Agency dik lo hmanga kalte chu sorkar tan pawh an chin hriat a har phah niin a sawi.

Kum 2014, June thla khan IS firfiakte chuan Mosul-ah India mi 40-te hi an man a, an zingah pakhat chu Muslim mi nia inchhalin a tlanchhuak thei a ni. Midang 39-te chu firfiakte hian an that vek a ni.