AP CM-in party dang hotute a kawm

Andhra Pradesh Chief Minister Chandrababu Naidu chu Thawhlehni khan ni hnih cham turin Delhi-ah a zin a, hemi ni vek hian Parliament Central Hall-ah party hrang hrang hruaitute hmuin AP-in Special Category Status (SCS) a phut chungchang a sawipui.

Thawhlehni-a Naidu-an Parliament Central Hall-a a hmuhte hi Sharad Pawar (NCP), Farooq Abdullah (J&K NC), Saugata Roy (TMC), Supriya Sule (NCP), Jyotiraditya Scindia (Congress), Jitender Reddy (TRS), M Veerappa Moily (Congress) leh Rajiv Satav (Congress) te an ni. Anni bakah hian Anupriya Patel (Apna Dal), Harsimrat Kaur Badal (Shiromani Akali Dal) leh Tariq Anwar (NCP) te a hmu bawk.

Andhra Pradesh-a rorellai, Telugu Desam Party (TDP) MP-te chuan an state tana special category status pek phutin Parliament inkhawmah pawh ṭum eng emaw zat an lo aubuai tawh a ni. TDP hian BJP kaihhruai National Democratic Alliance (NDA) sorkar rin tawk lohna motion a pu lut a, hei hi eptu party dangte pawhin an thlawp a ni. Mahse Parliament inkhawmnah rorel thei loa member-te an au buai reng avangin No-Confidence Motion pawh hi ngaihtuah theih a la ni lo.

Naidu chuan an state chunga dik lo taka rorel sak a nih dan chu bei let zel turin an party MP-te chu a fuih a, state mipui zawng zawngin an thlawp tih a sawi. AP CM hian BJP national president Amit Shah pawh lehkha thawnin, sorkar laipui chuan an state mipute duhdan chu a ngaih pawimawh sak lo niin a sawi.

NDA sorkarin AP hnena special caterogy status a pek duh loh avang hian thla hmasa khan TDP chu NDA a thawhpuina a lo titawp tawh a ni.