NDA MP-ten ni 23 hlawh la dawn lo
Sorkar laipui, National Democratic Alliance (NDA) hnuaia BJP leh an thawhpui party dang MP-te chuan Parliament Budget session neih chhunga rorel thei loa an awm hun chhung, ni 23 chhunga an hlawh leh allowance-te an la dawn lo tih an sawi.
Parliament budget session hi eptuten inkhawm an auhbuai leh bengchheng an siam ṭhin avangin ni rei tak rorel thei loin an awm a, inkhawm tihtawp a ni fo ṭhin a ni. Union Minister Anath Kumar chuan Parliament hi rorel thei loa hun rei tak siam a nih vangin sorkar chuan mipuite sum laksak turin dikna a nei lo a ni, a ti.
Ananth Kumar chuan, "BJP-NDA MP-te chuan ni 23 chhung atana hlawh leh allowance-te an la dawn lo a ni. Heng sumte hi mipuite rawngbawlna tura pek a ni a, mahse hei hi kan tih theih loh avangin heng pawisa neihsak tur hian dikna kan nei lo a ni", tiin a sawi.
Parliament in hnih, Lok Sabha leh Rajya Sabha-a hun rei tak rorel thei loa an awm chhanah Congress party a puh a, harsatna awmte chu sawiho an inpeih reng laiin boruak ṭha an siam duh lo a ni, a ti.
Hetih lai hian nimin khan eptu party 15 hruaitute chuan Parliament-a Mahatma Gandh lim hmaah nawrh an huaihawt. Eptu party hruaitute hian bank-a sum tam thak tichingpenna thleng te, SC/ST Act tihdal tumna nia sawi te leh CBSE paper leak chungchanga lungawi lohna an lantir a ni.
Parliament budget session hi chawlhlawk a nih hnuah March 5 aṭang khan a thawh hnihna neih a ni. Mahse session thawh hnihna hi eptu member-te au buai avangin mumal taka rorel theih lohin a awm a, bill pawimawh tak tak pawh tihkhawtlai a ni. Session chhunga bill tihkhawtlai zingah hian triple talaq bill, Citizenship Amendment Bill 2016 leh National Medical Commission Bill, 2017-te an tel. Bill pawimawh pahnih, The Payment of Gratuity (Amendment) Bill leh The Specific Relief (Amendment) Bill chu sorkar chuan member-te aubuaina karah, debate pawh nei loin voice vote hmangin a pass thei hram a ni. Nilaini khan Finance Bill leh a kaihhnawih bill pawimawh dangte pawh House-ah hian sawihona nei loin pass a ni bawk.