Moaist-te laka beihpui thlak chawl lailawk

Odisha-a Korapur district-a security force-ten Maoist hel laka beihpui an thlak chu nimin aṭang khan ni sarih chhung atan an chawl lailawk a ni. Hei hi Maoist helte inpekna hun hawnsakna atana siam a nih chu Superintendent of Police (SP), Kanwar Vishal Singh chuan a sawi.

State leh central force-te chuan kar khat chhung zet chu Koraput-a ramngaw-ah hel lakah beihpui an thlak a ni. SP chuan ramhnuaia beihpui thlak hi chawlh lailawk a ni dawn tih a sawi a, hemi rual hian kawngdungah chuan sipaite hian hel dap hna hi an thawk chhunzawm dawn tho tih a sawi a ni.

Singh chuan beihpui thlak chawlh lailawk a nih lai hian Maoist helte chu kawng dik zawh a, sorkar kuta inpe turin a sawm. Moaist hel inpete chu Odisha sorkarin surrender policy a siam angin awmna turte pawh ngaihtuahsak an ni dawn a ni, a ti.

Police-ten beihpui thlak chawlh rih a ni dawn tih an puan hnuah hian Koraput-a Pottangi area-ah chuan Maoist helte chu sorkar kuta inpe tura ngenna leh sawmna poster-te tarchhuah a ni. Heng poster-te hi “Yubak Jagaran Samiti” tih hming siam niin, helte chu inpe a, sorkarin an tana hamṭhatna a siamsakte dawng zawk turin an ngen a ni. Hei bakah hian police-te chu BSF leh CRPF-ten hel laka beihpui an thlakte lo dang turin an ngen bawk.