Arnab Goswami Jail-ah ni 14 tang dawn

Republic TV editor-in-chief, Arnab Goswami chu Nilaini khan kum 2018-a architect/interior designer Anvay Naik leh a nu intihhlum kaihhnawiha Nilaini khan man a nih hnuin, court chuan Jail-a ni 14 awm turin a ti. 

Police-te chuan Alibaug court-ah Goswamni hi ni 14 chhung an kawl an dil a, mahse court chuan  hei hi hnawlsakin jail-a awm turin a ti. Arnab Goswami-an police ten an man dawnin kut an thlak nia thubuai a thehluh chu court chuan a hnawlsak bawk. 

Anvay Naik hian a intihhlum dawna lehkha a hnutchhiahah, Arnab Goswami-a'n a pawisa tam tham tak a batsak chu a pek duh loh thu leh, hei vang hian sum lama  harsatna nasa tak a tawh phah thu a sawi. Hei vang hian Goswami hi thubuai siamsak a lo ni tawh a, Maharashtra-a sorkar hmasa, BJP sorkar laiin a thubuai hi tihtawp a ni. Mahse  hemi hnu hian Anvay Naik chhungte hi appeal lehin, sorkar thar chuan thubuai hi a hawng thar leh ta a ni. 

Arnab Goswami man a nih chungchangah centre-a BJP sorkara union minister eng emaw zat chuan a thlavang hauhin, Maharashtra sorkar thiltih chu an dem a, Emergency hun lai nente an tehkhin hial. Editors Guild of India leh News Broadcasters Association pawhin Goswami man a ni hi an dem thu an sawi a, mahse Mumbai based TVJA (Television Journalists Association) chuan Goswami man a nihna chhan hi mimal thil, journalism lam nena inkaihhnawihna nei lo a ni tih an sawi thung. 

News Broadcasters Association (NBA) chuan chief minister leh Shiv Sena hotu, Uddhav Thackeray hnenah sorkar thuneihna chu journalist-te laka phuba lakna atana hmang lo turin a ngen a, hemi rual hian Goswami-a journalism kalpui dan chu an thlawp lo tih a sawi nghal bawk. 

Anvay Naik-a nupui, Akshata Naik chuan a pasal leh a nu intih­hlum chungchang chhuina chu Goswani hian a thiltihtheihna hmangin a lo dansak tawh tih a sawi a, Goswani man tur hian hun rei tak an  ngen tawh a, Maharashtra police-ten an man ta chu lawmawm a tih thu sawiin, a pasal leh a nu thih dan chu dik taka chhui theih tawh ngei a nih a beisei thu a sawi. 

Arnab Goswami man a nih chungchangah union minister leh BJP hruaituten Maharashtra sorkar leh police-te na taka an sawisel chu Shiv Sena hotu Sanjay Raut chuan nimin khan chhang letin, "BJP in a thlavang an hauhsak nasat danah hian Arnab hi BJP worker leh a channel pawh BJP thu puanchhuahna ni ngeiin a lang a ni," a ti. 

Sanjay Raut chuan BJP hruiatute chu Arnab thlavang hauha an auchhuah mek laiin, Naik chhungkua chuan eng ang takin an lo tawrh tawh tih hriatpui turin hmu phawt se a ṭha dawn hle a ni tiin a sawi bawk.