PM Modi piancham pualin BJP-in vaccine pe tam record siam tum

Prime minister Narendra Modi chu nimin khan kum 71 a tling a, BJP chuan PM piancham pual hian nimin khan Covid vaccine pe tam record siam tumin an bei. Nimin tlai thleng khan ram pumah vaccine dose vaibelchhe hnih chuang pek chhuah hman a ni.

Union health minister Mansukh Mandaviya chuan PM Modi-a'n kum 20 chhung ram rawngbawl hna a thawh tawhna hriatpuina leh, a piancham lawmpuina thilpek atan vaccine la la lote chu la vek turin a ngen.

PM Modi-a kum 71 tlin lawmna pualin BJP chuan ni 20 chhung mega event - "Seva and Samarpan Abhiyan" an buatsaih dawn bawk.

BJP sorkarna state hrang hrangte chu vaccine pek chhuah runpui hi chak zawka kalpui tura ngenin, state official-te chu nikhata vaccine an pek chhuah ṭhin rate pawh a leta tipung turin hrilh an ni. BJP chuan vaccine pek chhuah runpui kalpui tur hian volunter nuai riat vel training a pe a ni.

Ni 20 awh mega outreach programme hian October 7 thleng a awh dawn a, hemi ni hi kum 2001-a Gujarat chief minister atana Narendra Modi lakluh cham a ni. He programme hman chhung hian BJP chuan faina beihpui thlak leh, blood donation campaign neih an tum bawk.Hmun hrang hrangah PM Modi hnenah miretheite hnena a thlawna buhfai sem leh, a thlawna vaccine semchhuah a nih avanga lawmthu sawina hoarding-te pawh siam an tum bawk.

BJP hian kum 2014 aṭang khan PM Modi-a piancham, September 17 hi 'Seva Diwas' (Service Day) ah an hmang a ni. A piancham pual hian kar khat chhung khawtlang tana rawngbawl hna hrang hrang an thawk ṭhin. Kuminah erawh chuan a lawmna hi public office a chelh kum 20-na pualin, ni 20 an hmang dawn a ni.