District 64-ah positivity rate 5% chunglam a la ni

Sorkar laipui chuan Ningani khan Covid vaccine semchhuak tam tur leh mipuite chu an zin veivah leh hunpui an hman hunahte fimkhur a, hri laka invenna tur kaihhruaina dante zawm a, mask vuah leh midang hlata awmte chu ngai pawimawh zel turin a chah.

India rama district 64-ah chuan covid-positivity rate 5% chunglam a la ni. Nitin hri kai thar tlahniam zel karah Kerala chu ramchhunga hri kai mek, active case nuai khat chuang nei awmchhun an ni.

State tam zawka hri leng hian ziaawm lam pan mah se, a pun thar leh a hlauhthawnawm avangin fimkhur reng turin a chah. Ram pum huapa kar khata hri kai hmuh chhuah thar, weekly positivity rate chu kar 11 chhung 3% hnuai lamah a awm tawh a ni.

"State hrang hrang dinhmun a zirin khuahkhirhna siam a ni a, Kerala state angah te pawh hri kai thar hi an tlahniam mek a ni. State dangte pawh an dinhmun a ziaawm chho mek. Mahse hunpui lo thleng turah hian hri a darh leh theihna remchang a awm tih kan hriat a ngai a ni," tiin Indian Council of Medical Research (ICMR) director Dr Balram Bhargava chuan a sawi. Tuna kan mamawh lian tak pali sawichhuakin, Bhargava chuan mipuite vaccine lak ṭhat te, Covid appropriate behaviour zawm, zinnaah fimkhur leh hunpui lo thlenga inthlahdah lohte a ni tih a sawi.

Ningani khan ram pumah hri kai thar 34,403 awm belh lehin, hri kai thar zingah a zahve aia tam, mi 22,182 chu Kerala state ami an ni. Hemi ni hian hri vanga thi mi 320 awm bawkin, Kerala-ah thihpui hi 178 an awm a ni.

Hri kai enkawl dam, recoverty rate hi 97.65% niin; kar khat chhung hri kai hmuh thar, weekly positivity rate hi 1.97% a ni mek bawk. Ni khata hri kai hmuh chhuah, daily positivity rate hi 2.25% a ni, 3% hnuai lamah ni 18 chhung a awm tawh.