Republic Day 2022 thleng hman turin Central Vista peih a ni ang : Hardeep Puri

Union minister Hardeep Singh Puri chuan Ningani khan Central Vista chu Republic Day 2022 thleng hman turin an peih tur thu a sawi.

Central Vista Avenue, Rashtrapati Bhavan - India Gate siamṭhat hna chu tun aṭanga thla hnih leh a chanve chhunga an zawh tur thu Minister chuan a sawi a ni.

"Central Vista Avenue siamṭhat hna kalpui mek a ni. January 26-a Republic Day lawmna chu Central Vista-ah hman a ni ang. Independence vawi 75-na kuma Parliament winter session chu Parliament thara nghat hman turin theihtawp kan chhuah dawn a ni," tiin media mite a kawmnaah a sawi. .

Minister hian Kasturba Gandhi Marg leh Africa Avenue-a Defence ministry leh armed forces hnathawk 7,000 awmna tur office complex pahnih hawn a nih ṭumin he thu hi a sawi a ni. He building pahnih hawngtu, prime minister Narendra Modi pawhin Central Vista project sawiseltute chu chhangletin, thudik lo leh dawt thu thehdarhah a puh. "Defence ministry leh armed force-a thawktu mi 7,000 te awmna tur sakte an hmuh hian Central Vista project sawiseltute chu an ngawi zui tawh a, thu dik lo an thehdarhte pawh hailan a ni zel tih an hrethiam tawh a ni," a ti.

Central Vista redevelopment project hnuaiah hian Parliament building thar, common central secretariat, Rajpath-a Rashtrapati Bhavan aṭanga India Gate kawng km thum siamṭhat, prime minister chenna in leh PMO thar bakah Vice President Enclave thar siam hnate thawh mek a ni.